QAZAQ AIR kompanııasy Bek Air jolaýshylaryn tasymaldaýǵa daıyn

NUR-SULTAN. QazAqparat – Bek Air ushaǵyna bılet alǵan jolaýshylar QAZAQ AIR áýe kompanııasynyń bıletterin tıimdi baǵamen ala alady, dep habarlaıdy QazAqparat.

«QAZAQ AIR áýe kompanııasy búgingi Almaty mańyndaǵy ushaq apaty saldarynan reısi toqtatylǵan jolaýshylardy qabyldaýǵa daıyn. 2019 jyldyń 31 jeltoqsanyna deıin Bek Air bıleti bar jolaýshylar QAZAQ AIR reısterindegi bos oryndardy qarastyra alady. Mundaǵy bıletter qunyn Bek Air bıletiniń qunynan asyrmaımyz», - dep habarlady áýe kompanııasy.

Bılet satyp alý úshin flyqazaq.com brondaý qyzmetin qoldanýǵa bolady.

Aıta keteıik, búgin tańerteń Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 95 jolaýshy men 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nursultan Nazarbaev jolaýshylar ushaǵynyń apatqa ushyraýyna baılanysty kóńil aıtty.

QR DSM ushaq apatynan zardap shekkenderge medıtsınalyq kómek kórsetý úshin resýrstar jetkilikti ekenin, qan tapsyrýdyń qajeti joq ekenin málimdedi.