Qazaq Air-ǵa eki ret konkýrs jarııalanyp, satylmaýynyń sebebi nede

ASTANA. KAZINFORM – Ótken jyldan beri «Qazaq Air» áýe kompanııasy eki ret satylymǵa qoıyldy. Biraq, saýda jasalmady, onyń sebebin «Samuryq-Qazyna» AQ damý jáne jekeshelendirý jónindegi basqarýshy dırektory Saltanat Sátjan túsindirdi.

«Ótken jyly «Qazaq Air» áýe kompanııasyn satý týraly ashyq konkýrs jarııalandy. Biraq, konkýrstyń birinshi satysynda usynystar bolǵan joq. Sondyqtan bıyl konkýrsty qaıta jarııaladyq. Ókinishke qaraı, ekinshi konkýrs ta sátsiz aıaqtaldy. Biraq, aıta ketetin jaıt, «Qazaq Air» áýe kompanııasyna qazaqstandyq jáne sheteldik ınvestorlardan da qyzyǵýshylyq boldy. Biz usynǵan baǵamyz 10 mıllıard teńge», - dedi Saltanat Sátjan Senat qabyrǵasynda ótken jıynnan keıin Kazinform agenttigi tilshisiniń saýalyna jaýap bere turyp.

Onyń aıtýynsha, atalǵan kompanııanyń Ulttyq qordan alǵan 38 mlrd teńge qaryzy bar.

«Qazaq Air-dy satyp alatyn ınvestor sol qaryzdy óteý kerek. Qazir biz áýe kompanııasyn qalaı jekeshelendirý jaǵyn qarastyrýdamyz. Aqpannyń sońyna deıin ınvestorlar óz usynystaryn bere alady, biz ony qarap, nátıjesin ashyq jarııalaımyz», - deıdi ol.

Eske sala ketsek, jyl basynda qaıta satýǵa qoıylǵan Qazaq Air áýe kompanııasynyń 38 mlrd teńge qaryzy baryn habarlaǵan edik.