Qazaq Air-diń Vietjet Qazaqstan retinde jumysqa kirisýi nege keshigip jatyr

ASTANA. KAZINFORM — Vietjet Qazaqstan-nyń jańa ushaqtary Qazaqstannyń áýe naryǵyna bıyl kirip bastaıdy. Bul týraly Kólik mınıstri Marat Qarabaev Senattaǵy Úkimet saǵatynan keıin ótken baspasóz máslıhatynda aıtty. 

— Bıylǵa qoıylǵan mindet — alǵashqy ushaqty jetkizý. Ázirge keshigý bar. Biraq biz jyl aıaǵyna deıin jetedi dep kútip otyrmyz. Keshigý Vietjet tarabynan ǵana bolyp otyrǵan joq. Bul — jahandyq problema. Áýe kompanııasynyń málimeti boıynsha, Boeing pen Airbus-qa uzyn sany 200 ushaqtyń tapsyrysy berilgen. Ókinishke qaraı, óndirýshiler keshiktirip jatyr. Bul óz kezeginde kompanııanyń Qazaqstan naryǵyna shyǵýyn kesheýildetip jatyr, — dedi mınıstr.

Onyń sózinshe, Vietjet Qazaqstan kompanııasy aldaǵy bes jylda Qazaqstan áýe naryǵyna jańa 5 ushaq engizbekshi. Vetnammen birlesken kásiporyn Qazaqstannyń óz ishinde de, syrtqa da jolaýshy tasymaldaýǵa nıettenip otyr.

Buǵan deıin Vetnamdyq ınvestor Qazaq Air áýe kompanııasynyń ataýyn ózgertkenin jazǵan edik.