QAZAQ AIR basshysy Erkin Naýryzbaev qyzmetinen ketti
ASTANA. KAZINFORM - 29 aqpanda Erkin Naýryzbaev QAZAQ AIR AQ basqarma tóraǵasy qyzmetin aıaqtady.
De-Havilland Dash 8-Q400 áýe kemesiniń komandıri jáne nusqaýshysy Erkin Ánesuly Naýryzbaev QAZAQ AIR áýekompanııasyn 2022 jyldyń 9 qyrkúıeginen bastap basqardy. Ol otandyq áýekompanııanyń tizginin ústaǵan alǵashqy qazaqstandyq avıatsııa mamany.
Erkin Ánesulynyń avıatsııadaǵy tájirıbesi – 19 jyl.
Basqarma tóraǵasy bolyp jumys istegen ýaqytynda áýekompanııa Skytrax bedeldi halyqaralyq avıatsııalyq reıtınginiń nátıjeleri boıynsha eki ret Ortalyq Azııa men TMD-nyń úzdik óńirlik áýekompanııalarynyń úshtigine kirdi.
2023 jyly áýekompanııa de-Havilland Dash 8-Q400 bes áýe kemesinde 588 myńnan astam jolaýshyny tasymaldady.
Bul – áýekompanııa tarıhyndaǵy rekordtyq kórsetkish.
Sondaı-aq, onyń basqarý kezeńinde halyqaralyq jáne turaqty áýe marshrýttarynyń sany artty, jańa áleýmettik mańyzy bar óńirlik reıster ashyldy, sondaı-aq 2024 jyldyń basynan bastap áýe bıletterin taratý jelisi keńeıtildi.
Basqarma tóraǵasynyń mindetterin ýaqytsha atqarý Nurlan Muratuly Jaqypovqa júkteldi.
