Qazaq Air Aqtóbeden Qazanǵa áýe reısterin ýaqytsha toqtatty

ASTANA. KAZINFORM – Qazaq Air Aqtóbeden Tatarstan astanasy Qazan qalasyna deıingi áýe reısterin ýaqytsha toqtatqanyn habarlady.

«Ushý qaýipsizdigin qamtamasyz etý úshin 5 sáýirden bastap Aqtóbe-Qazan-Aqtóbe baǵyty boıynsha áýe qozǵalysy toqtatylady», - delingen habarlamada.

Josparlanǵan reısterdi qalpyna keltirý týraly keıinirek habarlanbaq.

Munyń sebebi belgili. Bir kún buryn ushqyshsyz ushaqtar Tatarstannyń Elabýga jáne Nıjnekamsk qalalaryndaǵy kásiporyndarǵa shabýyl jasaǵan bolatyn.

QR Qorǵanys mınıstrliginiń baspasóz qyzmeti keıbir Telegram arnalarynda taraǵan Tatarstandaǵy nysandarǵa shabýyl jasaǵan ushqyshsyz ushaqtar Qazaqstan aýmaǵynan ushyryldy degen aqparatty joqqa shyǵardy.