«Qazaqstandyq» atty kitap jaryqqa shyqty
Eńbektiń avtory jazýshy, túrki halyqtarynyń rýhanı mádenıetin zertteýshi, saıahatshy, respýblıkalyq ádebı syılyqtarynyń laýreaty - Tınkaı Kretova. Avtor bul týyndyny eline arnap otyrǵanyn aıtady. Oǵan túrli adamdardyń taǵdyry arqaý bolyp, Qazaqstannyń baı da ásem tabıǵaty da qamtylǵan. Sondaı-aq Qazaqstan ulttyq geografııalyq qoǵamynyń «Kıeli Qazaqstan» zertteý ekspedıtsııasy barysynda jazylǵan ocherkter engizilgen. Kitapty jaryqqa shyǵarý úshin Tınkaı Qazaqstannyń óńir-óńirine saıahat jasaǵan.
«Shama-sharqymsha kóshpeli mádenıetti zertteýge bet burǵan adammyn. Qazaqstan men onyń tarıhy, mádenıeti men tabıǵatynyń qyr-syry týraly bárin bildim, toldym degim kelmeıdi. Bálkim, kitabymǵa barynsha patrıottyq sıpat berýge tyrysqandyqtan bolar, bireýler oqyǵysy kelmeýi de múmkin. Sebebi, qazir árkimniń óz ustanymdary bar. Mine, sol sebepti, barynsha pragmatıkalyq kózqarastaǵy adamdarmen ortaq til tabysý kerek degen oıdy jetkizgim keledi. Dál osy «Qazaqstandyq» kitabym - ortaq úılesimdi izdeý úshin jazylǵan shyǵarma», - dedi Tınkaı Kretova.
Tusaýkeser rásimine qoǵamdyq qaıratkerler, jas jazýshylar jáne stýdent jastar qatysty.
Búgingi is-shara barysynda Qazaqstan boıynsha jasalǵan fotosýretter men beınetúsirilimder kórsetildi. Sonymen qatar avtordyń kitaptary jáne Tuńǵysh Prezıdent Qory shyǵarǵan «Altyn tobylǵy» ádebı jınaǵy utysqa salyndy.
Aıta keterligi, buǵan deıin Tınkaı Kretova «Qaztaban» povesi úshin Tuńǵysh Prezıdent Qorynyń «Altyn Tobylǵy - 2016» ádebı syılyǵyna ıe bolǵan edi.
