Qatar Airways Qazaqstanǵa áýe reısterin ashady

NUR-SULTAN. QazAqparat – Qatar Airways Qazaqstanǵa áýe reısterin ashady. Bul jaıynda QR Indýstrııa jáne ıfraqurylymdyq damý mınıstrligi Azamattyq avıatsııa komıtetiniń Facebook-paraqshasynda jarııalanǵan aqparatta aıtylǵan, dep habarlaıdy QazAqparat tilshisi.

Komıtettiń málimetinshe, 2020 jyldyń 30 naýryzynda «Qatar Airways» áýe kompanııasy Doha men Nur-Cultan qalalary, al 1 sáýirde Doha jáne Almaty qalalary arasynda alǵashqy reısti oryndaıdy. Atalmysh reıster Boıng-787 (Dreamliner) úlgisindegi áýe kemesimen oryndalady.

«Qatar Airways» áýe kompanııasy Doha qalasynan Nur-Sultan qalasyna aptasyna 2 ret jáne Almaty qalasyna aptasyna 4 ret jıilikpen Airbus-320 úlgisindegi áýe kemesimen turaqty jolaýshylar reısterin oryndaıdy.

Jalpy, «Qatar Airways» áýe kompanııasy Qazaqstanǵa aptasyna 6 ret turaqty túrde ushatyn bolady.

Eki el arasyndaǵy reısterge bıletterdiń satylymyn bastaý 16 qańtarǵa josparlanǵan.

Reıstiń ashylýy qazaqstandyq jolaýshylarǵa «Qatar Airways» áýe kompanııasynyń 160 baǵytyna sapar shegýge múmkindik beredi.

«Qatar Airways» - Katardyń ulttyq áýe kompanııasy, álemdegi eń iri áýe kompanııalardyń biri. Áýe kemeleriniń parki 233 ushaqtan turady. Basty tranzıttik haby - Doha qalasyndaǵy Hamad halyqaralyq áýejaıy. 2018 jyldyń qorytyndysy boıynsha áýe kompanııasy 29 mln jýyq jolaýshy tasymaldady.