«Qatar Airways» Qazaqstanǵa áýe reısterdi ashady

NUR-SULTAN. QazAqparat - 2021 jylǵy 31 tamyzda Qazaqstan Respýblıkasynyń aýmaǵynda koronavırýs ınfektsııasynyń paıda bolýy men taralýyna jol bermeý jónindegi vedomstvoaralyq komıssııanyń kezekti otyrysyna Qazaqstan men Katar arasynda turaqty áýe qatynasyn ashý máselesi shyǵaryldy.

Nátıjesinde «Qatar Airways» áýe kompanııasy 2021 jylǵy 15 qazannan bastap Doha jáne Almaty qalalary arasynda Qazaqstanǵa turaqty reısterdi oryndaýdy bastaýdy josparlap otyr, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń Facebook paraqshasyna silteme jasap.

Bul Qazaqstannyń Azamattyq avıatsııa komıteti jáne Katar eliniń avıatsııalyq bılik organdarynyń eki el arasyndaǵy áýe qatynasy salasynda quqyqtyq bazany qurý jáne keńeıtý jónindegi keń aýqymdy jumysynyń arqasynda múmkin bolyp otyr.

Reıster sanıtarlyq-epıdemıologııalyq talaptardy qatań saqtaı otyryp jáne áýe kompanııa saıtynda jarııalanǵan kestege sáıkes A-320 úlgisindegi áýe kemesinde dúısenbi jáne juma kúnderi aptasyna 2 reıs jıiligimen oryndalady dep josparlanýda.

Eki el arasynda turaqty reısterdiń ashylýy Qazaqstan men Katar arasyndaǵy saýda-ekonomıkalyq, mádenı jáne týrıstik qatynastardy odan ári damytýǵa yqpal etetin bolady.