Qatar Airways álemniń barlyq elderindegi dárigerlerge 100 myń tegin bılet taratpaq
DOHA. QazAqparat – Qatar Airways áýe kompanııasy COVID-19 pandemııasymen kúresken medıtsına qyzmetkerlerine alǵys retinde ushaqqa minýge 100 000 tegin bılet syılaıdy, dep habarlaıdy QazAqparat áýe kompanııasynyń resmı saıtyna silteme jasap.
Bul biregeı aktsııa 12 mamyr kúni bastalyp, 18 mamyrda, Doha ýaqytymen saǵat 23:59-da aıaqtalady. Medıtsınalyq qyzmetkerler qatarairways.com/ThankYouHeroes kompanııasynyń saıtynda tirkelip, kezek tártibinde beriletin promo-kodty alý úshin arnaıy úlgini toltyrýy tıis.
Bıletti álemniń kez kelgen elinde turatyn medıtsınalyq qyzmetkerler alýǵa quqyly. Bıletti alý ádil bolý úshin árbir el 12-18 mamyr aralyǵynda turǵyndar sanyna baılanysty bıletterdiń belgili bir sanyn alady.
Promo-kod alǵan medıtsınalyq qyzmetkerler áýe kompanııasy ushatyn kez kelgen núktege eki adam – ózi jáne serigine baryp-kelýge múmkindik beretin ekonom klastaǵy eki tegin bılet ala alady. Bıletter 26 mamyrǵa deıin brondalýy tıis, bul rette olardy 2020 jyldyń 10 jeltoqsanyna deıin paıdalanýǵa bolady.
foto: albawaba.com
