Qarmet jáne QazTransOıl ónerkásiptik kooperatsııany damytyp jatyr
TEMIRTAÝ. KAZINFORM — Qarmet kompanııasy, «QazTransOıl» AQ jáne magıstraldyq munaı qubyrlarynyń ulttyq operatorynyń enshiles kásiporny — «Magıstraldyq Sýaǵyzǵy» JShS metall synyqtaryn tikeleı jetkizý týraly kelisimderge qol qoıdy. Jańa kelisimder elimizdegi iri kásiporyndar arasyndaǵy ónerkásiptik kooperatsııany damytý jolyndaǵy mańyzdy qadam bolyp esepteledi. Olar qazaqstandyq metallýrgııa salasyn strategııalyq mańyzy bar shıkizatpen qamtamasyz etýge, ony el ishinde qaıta óńdeý kólemin arttyrýǵa jáne otandyq óndiristi qoldaýǵa baǵyttalǵan.
Qol jetkizilgen ýaǵdalastyqtar kompanııalar, memlekettik organdar jáne salalyq qaýymdastyqtardyń birlesken jumysynyń nátıjesi boldy. Sońǵy aılarda taraptar qazaqstandyq kásiporyndardy metall synyqtarymen tikeleı ári tıimdi qamtamasyz etýge múmkindik beretin ashyq júıe qalyptastyrý tetigin ázirledi. Erekshe nazar strategııalyq mańyzy bar shıkizatty eń aldymen el ishinde paıdalanýǵa jaǵdaı jasaýǵa aýdaryldy. Bul qaıta óńdeý ónerkásibiniń damýyna, sondaı-aq ulttyq ekonomıkada qosylǵan qundy arttyrýǵa yqpal etedi.
Jobany júzege asyrý úshin «QazTransOıl» kompanııalar toby aýqymdy daıyndyq jumystaryn júrgizdi. Atap aıtqanda, qara jáne tústi metaldardyń synyqtary men qaldyqtaryn kóterme saýda arqyly ótkizýge qajetti barlyq ruqsat qujattary alyndy. Sonymen qatar kompanııalardyń quryltaı qujattaryna tıisti ózgerister engizilip, metall synyqtaryn ótkizý tártibin retteıtin ishki rásimder ázirlenip, bekitildi. Júrgizilgen jumystar deldaldardyń qatysýynsyz tikeleı jetkizilimderdi bastaý úshin qajetti quqyqtyq jáne uıymdastyrýshylyq negiz qalyptastyrdy.
Qol qoıylǵan qujattarǵa sáıkes, «QazTransOıl» AQ men Qarmet AQ arasyndaǵy kelisim bir jyl merzimge jasaldy. Al «Magıstraldyq Sýaǵyzǵy» JShS men Qarmet kompanııasy arasyndaǵy kelisim bes jylǵa eseptelgen. Bul taraptardyń uzaq merzimdi yntymaqtastyqqa jáne turaqty seriktestik ornatýǵa múddeli ekenin kórsetedi. Kelisimniń uzaq merzimdi bolýy shıkizat jetkizý kólemderin aldyn ala josparlaýǵa jáne óndiristik úderisterdiń tıimdiligin arttyrýǵa múmkindik beredi.
Sonymen birge kompanııalar arasyndaǵy yntymaqtastyq tek metall synyqtaryn jetkizýmen shektelmeıdi. Seriktestikti damytýdyń kelesi kezeńi buryn paıdalanylǵan qubyr ónimderin jetkizýdi qarastyratyn jeke kelisimge qol qoıý bolmaq. Bul baǵyt ekinshi rettik resýrstardyń ónerkásiptik aınalymǵa tartylatyn túrlerin keńeıtýge jáne olardy tıimdi paıdalanýdy arttyrýǵa múmkindik beredi.
Sarapshylardyń pikirinshe, metall synyqtaryn tikeleı ári maqsatty túrde ótkizý júıesine kóshý jekelegen kásiporyndar úshin de, Qazaqstannyń búkil metallýrgııa salasy úshin de mańyzdy mánge ıe. Qarmet kompanııasy úshin jańa kelisimder óndiristik qýattardy turaqty paıdalaný úshin qajetti qosymsha shıkizat kólemin alýǵa múmkindik beredi. Bul metall ónimderin shyǵarý kólemin arttyrýǵa, óndiristik úderisterdiń tıimdiligin kóterýge jáne el ishinde qaıtalama materıaldyq resýrstardy qaıta óńdeýdi keńeıtýge jaǵdaı jasaıdy.
Jobanyń ekologııalyq áseri de erekshe mańyzǵa ıe. Metall synyqtaryn shıkizat retinde paıdalaný tabıǵı resýrstardy tutynýdy aıtarlyqtaı azaıtýǵa, bolat óndirýge jumsalatyn energııa shyǵyndaryn tómendetýge jáne ónerkásiptik shyǵaryndylar kólemin qysqartýǵa múmkindik beredi.
Jasalǵan kelisimder jalpy otandyq ónerkásiptiń damýyna da oń áser etedi. Іri ulttyq kompanııalar arasyndaǵy kooperatsııalyq baılanystardyń nyǵaıýy turaqty óndiristik tizbekterdi qalyptastyrýǵa, shıkizatty qaıta óńdeýdi jergilikti deńgeıde arttyrýǵa jáne ekonomıkanyń aralas salalaryn damytý úshin jańa múmkindikter ashýǵa yqpal etedi.
Qarmet, «QazTransOıl» AQ jáne «Magıstraldyq Sýaǵyzǵy» JShS arasyndaǵy yntymaqtastyq qazaqstandyq iri kásiporyndardyń tıimdi ózara is-qımylynyń taǵy bir naqty mysaly bolyp otyr.
