Qarmet jańa sortoprokat kesheni qurylysynyń belsendi kezeńine kiristi
TEMІRTAÝ. KAZINFORM — Temirtaýdaǵy metallýrgııalyq kombınat óndiristik qýattardy aýqymdy jańǵyrtý jumystaryn jalǵastyryp jatyr. Qarmet kompanııasynyń eń iri ınvestıtsııalyq jobalarynyń biri jańa kezeńge ótti: bolashaq sortoprokat kesheniniń qurylys alańynda alǵashqy metall tireý ornatyldy. Bul qadam qurylys jumystarynyń belsendi kezeńiniń jáne jańa óndiristik nysannyń naqty qalyptasý úderisiniń bastalǵanyn bildiredi.
Bolashaq sortoprokat tsehy kásiporyndy uzaq merzimdi jańǵyrtý baǵdarlamasynyń bir bóligine aınalady. Baǵdarlama tehnologııalyq jańarýǵa, óndiristik múmkindikterdi keńeıtýge jáne qosylǵan quny joǵary ónim shyǵarýǵa baǵyttalǵan. Qurylys júrip jatqan alańda jańa keshenniń qańqasy birtindep qalyptasa bastady. Aldaǵy ýaqytta bul joba kompanııanyń metall ónimderi naryǵyndaǵy pozıtsııasyn ishki jáne syrtqy naryqtarda kúsheıtýi tıis.
Joba aıasynda jylyna qosymsha 540 myń tonnadan astam ónim óndiretin zamanaýı óndiristi iske qosý kózdelgen. Jańa keshende qurylys salasynda suranysqa ıe A600 jáne A1000 markaly beriktigi joǵary armatýra, sondaı-aq metall ónimderiniń jańa túrleri — buryshtyq profılder men shvellerler shyǵarý josparlanyp otyr. Ónim túrleriniń keńeıýi kompanııaǵa qurylysqa arnalǵan metall prokaty segmentindegi úlesin arttyryp, ónimniń básekege qabilettiligin kúsheıtýge múmkindik beredi.
Qarmet kompanııasynda jobany júzege asyrý metallýrgııalyq óndiristiń tıimdiligin arttyrýǵa jáne zamanaýı qaıta óńdeý baǵyttaryn damytýǵa negizdelgen strategııalyq kýrsqa tolyq sáıkes keletinin atap ótti. Jańa sortoprokat kesheni Temirtaýdaǵy kombınatty tehnologııalyq jańǵyrtýdyń negizgi elementteriniń birine aınalýy tıis.
Qazirgi tańda kompanııa bir mezette birneshe iri ınfraqurylymdyq jáne óndiristik jobalardy qatar júzege asyryp jatyr. Sortoprokat kesheniniń qurylysynan bólek, kásiporynda № 8–9 jańa kokstyq batareıalardy salý, ystyq myryshtaý jáne polımerlik jabyndar jelisin iske qosý, sondaı-aq zamanaýı quıý-prokattaý keshenin turǵyzý jumystary júrgizilip jatyr.
Aýqymdy jańǵyrtý óndiris kólemin ulǵaıtýǵa ǵana emes, shyǵarylatyn ónim qurylymyn ózgertýge de baǵyttalǵan. Kompanııa tehnologııalyq turǵydan anaǵurlym jetildirilgen ári suranysqa ıe metall prokaty túrlerine basymdyq berip otyr. Bul ósip kele jatqan básekelestik pen naryq talaptarynyń ózgerýi jaǵdaıynda kásiporynnyń turaqtylyǵyn arttyrýy tıis.
Temirtaý úshin mundaı jobalardy júzege asyrý strategııalyq mańyzǵa da ıe. Óndiristik qýattardy jańartý óńirdiń ónerkásiptik áleýetin damytýǵa, jańa jumys oryndaryn ashýǵa jáne metallýrgııa salasyna qosymsha ınvestıtsııalar tartýǵa yqpal etedi. Sonymen qatar jańǵyrtý zamanaýı tehnologııalyq sheshimderdi engizýge jáne óndiristik qaýipsizdikti arttyrýǵa múmkindik beredi.
Aldaǵy jyldary dál osyndaı jobalar kombınattyń odan ári damýynyń jáne qazaqstandyq metallýrgııanyń halyqaralyq naryqtaǵy pozıtsııasyn nyǵaıtýdyń negizi bolmaq.
