Qarmet-tiń jańa kesheni jylyna 240 myń tonna ónim shyǵaratyn bolady
TEMІRTAÝ. KAZINFORM — Temirtaýdaǵy metallýrgııa kombınatynda óndiristi jańǵyrtýǵa baǵyttalǵan mańyzdy jobalardyń biri júzege asyrylyp jatyr. Jańa keshen tek joǵary qosylǵan quny bar ónim kólemin arttyryp qana qoımaı, ekonomıkanyń túrli salalarynyń qajettilikterin qamtamasyz etý úshin otandyq metallýrgııanyń múmkindikterin keńeıtýge jol ashady.
Qarmet kompanııasy 2025 jyldan bastap ystyqtaı úzdiksiz myryshtaý jáne polımerli jabyn jaǵý boıynsha zamanaýı keshen salý jobasyn júzege asyrýda. Jańa óndiristik nysan kásiporyndy tehnıkalyq jańǵyrtýdyń aýqymdy baǵdarlamasynyń bir bóligine aınalyp, qorǵanysh polımerli jabyny bar ónimderdi qosa alǵanda, myryshtalǵan metall óndirisin edáýir arttyrýǵa múmkindik beredi.
Joba aıasynda eki negizgi óndiristik jeli salý qarastyrylǵan. Ystyqtaı úzdiksiz myryshtaý jelisiniń qýaty jylyna 240 myń tonna ónimdi qurasa, polımerli jabyndar jelisi jyl saıyn 180 myń tonnaǵa deıin ónim shyǵarýǵa múmkindik beredi. Qurylys jumystary júrgiziletin aýmaqtyń jalpy kólemi 30 myń sharshy metrden asady.
Jańa keshen Qarmet damýynyń mańyzdy nysandarynyń birine aınalady. Sebebi ol shyǵarylatyn metall ónimderiniń túrlerin keńeıtip, joǵary qosylǵan quny bar ónim úlesin arttyrýǵa múmkindik beredi. Myryshtalǵan jáne boıalǵan ılem qurylys salasynda, ónerkásipte, mashına jasaýda jáne ınfraqurylymdyq jobalardy júzege asyrý barysynda keńinen suranysqa ıe.
Jańa óndiris ornyna arnalǵan negizgi tehnologııalyq jabdyqtardy jetkizýshi — John Cockerill Industry Technologies Co. Ltd (Beijing) kompanııasy. Kompanııa ónerkásiptik jobalardy júzege asyrý jáne metallýrgııa salasyna arnalǵan tehnologııalyq sheshimderdi usyný baǵytynda halyqaralyq tájirıbesi óte mol.
— Qazirgi kezeńde bazalyq ınjınırıngti qabyldaý jumystary aıaqtalyp, qurylys alańyn daıyndaý júrgizilip jatyr. Jobanyń aýqymy shamamen 200 myń tekshe metr jer jumystarynyń oryndalýyn, 20 myń tekshe metr temirbeton konstrýktsııalaryn salýdy, shamamen 7 myń tonna metall konstrýktsııalaryn montajdaýdy jáne 5,5 myń tonnadan astam tehnologııalyq jabdyqty ornatýdy kózdeıdi, — dedi joba mamandary.
Osyndaı aýqymdy nysandy júzege asyrý keshendi daıyndyqty jáne qurylys-montaj jumystarynyń úlken kólemin talap etedi. Alańda óndiristik ǵımarattar boı kóterip, zamanaýı jabdyqtar ornatylyp, olardyń metallýrgııalyq kombınattyń qoldanystaǵy ınfraqurylymyna kiriktirilýi qamtamasyz etiledi.
Keshen paıdalanýǵa berilgennen keıin Qarmet myryshtalǵan jáne boıalǵan ılem óndirisin aıtarlyqtaı arttyryp, metall ónimderi naryǵyndaǵy pozıtsııasyn nyǵaıtady jáne qazaqstandyq tutynýshylarǵa otandyq óndiristiń keńeıtilgen ónim túrlerin usyna alady.
Jańa nysan otandyq ónerkásiptiń damýyna da eleýli úles qosady. Óıtkeni ol Qazaqstannyń qurylys, ónerkásip jáne ınfraqurylym salalaryn zamanaýı sapa talaptaryna saı keletin otandyq metall ónimderimen qamtamasyz etýge múmkindik beredi.
