Qarmet-tiń Sıngapýrdegi offshorlyq kompanııaǵa ótip ketkeni ras pa — mınıstrlik jaýaby
ASTANA. KAZINFORM — Ónerkásip jáne qurylys mınıstriniń orynbasary Oljas Saparbekov Úkimet otyrysynan keıin ótken baspasóz máslıhatynda Qarmet quryltaıshylarynyń aýysqany týraly málimetterdi teriske shyǵardy.
— Áleýmettik jelide Qarmet-tiń Astana halyqaralyq qarjy ortalyǵyndaǵy quryltaı qujattary men eGov.kz platformasyndaǵy quryltaı qujattary sáıkespeıtini týraly saýaldar týyndap jatyr. Osy málimetke súıenip keıbir sarapshylardyń «Qarmet Sıngapýrdegi offshorlyq kompanııaǵa ótip ketti» dep boljap júrgeni bar. Ol kompanııanyń artynda reseılik ınvestor tur dep esepteıtinder bar. Osyǵan ne deısizder, — dep surady jýrnalıst.
Vıtse-mınıstr bul málimettiń bárin teriske shyǵardy.
— Sıngapýr memleketinde Qarmet-tiń fılıaly ashylǵan. Ol fılıal Qarmet-tiń eksport máselelerimen, basqa da suraqtarmen aınalysady. Sol úshin ashylǵan. Qarmet qazirgi ýaqytta qazaqstandyq kompanııa bolyp esepteledi. Búkil ıeleri osynda, osynda jumys istep jatyr. Salyqtyń bárin memleketke tólep otyr, ıaǵnı Sıngapýrdaǵy kompanııa Qarmet-tiń quryltaıshysy degen aqparat shyndyqqa janaspaıdy. Ol — fılıal ǵana, — dedi Oljas Saparbaekov.
«QazIndustry» qazaqstandyq ındýstrııa jáne eksport ortalyǵy» aktsıonerlik qoǵamy basqarma tóraǵasynyń orynbasary Aıdar Qojahmetov te Qarmet-tiń quryltaıshylary túgel qazaqstandyq azamattar ekenine sendirdi.
— Kásiporynnyń quryltaıshylary Astana halyqaralyq ortalyǵynda tirkelgen. Akıtsonerlik quryltaıshylary bekitilgen. Sondyqtan Sıngapýrde enshiles basqa quryltaıshylary bar degen málimetti joqqa shyǵaramyz. Ol fılıal Qarmet-tiń óndirisin jańǵyrtý jumystaryna qarjy tartý máselelerin pysyqtaýmen aınalysady. Sondaı-aq, ónimdi eksportqa shyǵarý máselesimen aınalysady, — dedi ol.
Eske salsaq, 2023 jyly sol kezdegi «ArselorMıttal Temirtaý» kompanııasyna tıesili kómir shahtalarynda kisi ólimi azaımaı qoıǵanyna baılanysty quryltaıshysy ózgerip, kásiporyn resmı túrde QARMET degen ataý alǵan bolatyn.
Al byltyr kúzde «Qarmet» quryltaıshylary byltyr kásiporynnyń kombınaty jumysyn jańǵyrtýǵa 35 mlrd teńge bóletini belgili bolǵan edi.