Temirtaýda iri alaıaqtyq áshkerelendi: kásiporynǵa 190 mln teńge shyǵyn kelgen
ASTANA. KAZINFORM — 27 sáýirde Qaraǵandy oblysynda polıtsııa qyzmetkerleri «Qarmet» AQ-da áreket etken qylmystyq toptyń qyzmetin toqtatty. Bul týraly Polisia.kz jazdy.
Anyqtalǵandaı, kúdiktiler jasyryn alaıaqtyq shemalardy qoldanyp jáne kásiporynnyń jekelegen qyzmetkerlerimen sóz baılasa otyryp, jetkiziletin shıkizattaǵy temir quramynyń kórsetkishterin qoldan kóterip otyrǵan. Kásiporynǵa keltirilgen zalal shamamen 190 mln teńgeni qurady.
— Barlyǵy zańsyz áreketterge qatysy bar 13 adam ustaldy — olardyń barlyǵy Temirtaý qalasynyń turǵyndary. Tintý barysynda iri kólemde qarajat jáne basqa da zattaı dáleldemeler tárkilendi, sotqa deıingi tergeý júrgizilip jatyr, — delingen habarlamada.
Qabyldanǵan sharalar qalaquraýshy kásiporynnyń turaqty jumysy men tirshiligin qamtamasyz etýge baǵyttalǵan. Bul baǵyttaǵy jumys jalǵasatyn bolady.
Buǵan deıin Qaraǵandy oblysynda ınternet-alaıaqtyqtyń 335 faktisi tirkelgenin jazdyq.
