Qarmet temir-qaldyqtardy qaıta óńdeýdiń jańa alańyn iske qosty
QARAǴANDY. KAZINFORM – Qarmet qurylymynda metallýrgııalyq kombınatqa jaqyn ornalasqan zamanaýı temir-qaldyqtardy qaıta óńdeý alańy jumysyn bastady. Jańa nysan táýligine 300 tonnaǵa deıin shıkizatty óńdeýge múmkindik berip, negizgi operatsııalardy tolyq avtomattandyrady.
Nysandy iske qosý ishki óndiristik protsesterdi ońtaılandyrýdaǵy mańyzdy qadamǵa aınaldy. Joǵary ónimdi jabdyqtyń arqasynda jumys tıimdiligi edáýir artty, al logıstıka jeńildep, kásiporyn men jetkizýshiler úshin yńǵaıly bola tústi.
Alań jeke tulǵalardan jáne «Qarmet» AQ-pen tikeleı kelisimshart jasaǵan uıymdardan temir-qaldyqtardy qabyldaıdy. Kún saıyn árqaısysy 20 tonnaǵa deıin jetetin 15–20 kólik keledi. Dál esep júrgizý úshin avtomobıl tarazylary ornatylǵan, al barlyq operatsııa avtomattandyrylǵan. Operator júk salmaǵyn syrtqy kameralar arqyly tirkep, kólikti túsirý aımaǵyna baǵyttaıdy.
Qoımada mobıldi qaıta tıegishter men 1 000 tonna qýattylyqtaǵy gıdravlıkalyq press qoldanylady, ol tyǵyz jáne tasymaldaýǵa yńǵaıly brıketter jasaıdy. Qarmet kompanııasy jaqyn arada ekinshi uqsas press ornatýdy josparlap otyr, bul qaıta óńdeý kólemin odan ári arttyrady.
Temir-qaldyqtardy qabyldaý jáne qaıta óńdeý ýchaskesiniń basshysy Mádı Erbolattyń aıtýynsha, barlyq protsess qazirgi zamanǵy qaýipsizdik talaptary men óndiristik tártipke saı uıymdastyrylǵan.
– Qaldyq press kamerasyna túsedi, sodan keıin qysymdaý protsesi bastalady. Daıyn brıket qoımaǵa ornalastyrylady, keıin temirjol arqyly konverter tsehyna jetkiziledi. Barlyq kezeńder beınebaqylaýda, tehnologııalyq reglament saqtalady. Aýmaq táýlik boıy kúzetpen qorǵalǵan, — dedi ol.
Buryn temir-qaldyqtar tikeleı koprov tsehyna jetkizilip, júk kólikteriniń keptelisine ákeletin. Qala shetindegi respýblıkalyq trassaǵa jaqyn jańa alań bul máselelerdi sheship, logıstıkany ońtaılandyrdy.
Zamanaýı obektini iske qosý Qarmet kompanııasynyń ınfraqurylymdy jańǵyrtý jáne óndiris tıimdiligin arttyrý jumysynyń bir bóligi bolyp otyr. Jańa alań kombınattyń shıkizattyq turaqtylyǵyn kúsheıtip, qaıta óńdeý qýattaryn damytýǵa múmkindik beredi.
Temir-qaldyqtardy qabyldaý boıynsha baılanys nómirleri:
Tel.: +7 (7213) 96 53 51 (Gýlnaz)
E-mail: gulnaz.abdikairova@qarmet.kz