Qarmet shahtalaryna jańa jerasty tehnıkalary jetkizildi
QARAǴANDY. KAZINFORM – Qarmet kompanııasynda kásiporyndardy jańǵyrtý baǵdarlamasy aıasynda shahtalarǵa taý-ken qazbalaryn júrgizýge arnalǵan zamanaýı jerasty tehnıkalary jetkizildi. Bul óndiristik ınfraqurylymdy jańartý, jumys tıimdiligin arttyrý jáne eńbek qaýipsizdigin kúsheıtý baǵytyndaǵy júıeli jumystardyń bir bóligi bolyp otyr.
Qazirgi ýaqytta «Shahtınsk» shahtasynyń mamandary jetkizýshi kompanııa ókilderimen birlesip jańa KP-21 úńgý kombaınyn synaqtan ótkizip jatyr. Aldymen jabdyq jer ústinde tolyq tekseristen ótedi: baqylaý jınaǵy ornatylyp, barlyq tehnıkalyq júıeniń jumysy synaq rejıminde tekseriledi. Osy kezeń aıaqtalǵannan keıin kombaın bólshektelip, shahtaǵa túsiriledi. Jerasty kenjarynda ol qaıta qurastyrylyp, óndiristik ýchaskede tikeleı jumysqa qosylady.
Jańa tehnıka daıyndyq qazbalaryn, tonnelder men shtrekterdi júrgizýge arnalǵan. Dál osy qazbalar arqyly keıin kómir tasymaldanyp, óndiristik jabdyqtar jetkiziledi jáne shahtanyń tıimdi jeldetilýi qamtamasyz etiledi. Sondyqtan mundaı jumystardyń jyldam ári sapaly oryndalýy jańa kómir óndirý ýchaskelerin ýaqytynda iske qosýǵa tikeleı áser etedi. Sarapshylardyń aıtýynsha, daıyndyq qazbalarynyń qarqyny jalpy óndiristiń turaqtylyǵyn aıqyndaıtyn mańyzdy faktorlardyń biri sanalady.
KP-21 kombaınynyń basty erekshelikteriniń biri – qashyqtan basqarý jáne tsıfrlyq monıtorıng júıesiniń bolýy. Mashına túrli datchıktermen jáne derekterdi berý júıelerimen jabdyqtalǵan. Sonyń arqasynda onyń negizgi jumys parametrlerin naqty ýaqyt rejıminde baqylaýǵa múmkindik bar. Jabdyqtyń tehnıkalyq jaı-kúıi týraly barlyq aqparat Wi-Fi baılanysy arqyly shahta dıspetcheriniń basqarý pýltine jiberiledi.
- Jer ústinde otyryp-aq mashınanyń barlyq júıesiniń jumysyn, suıyqtyq deńgeılerin, jumys rejımderin jáne basqa da parametrlerin qashyqtan baqylaýǵa bolady. Qajet bolǵan jaǵdaıda protsesti Kómir departamentiniń Dıspetcherlik-taldaý ortalyǵynyń mamandary da qadaǵalaı alady, - dedi «Shahtınsk» shahtasynyń ótpe jumystary jónindegi bas ınjeneriniń orynbasary Sergeı Solohın.
Zamanaýı úńgý kombaıny taý jynysyn buzý protsesin áldeqaıda tıimdi ári qaýipsiz etedi. Mashına elektr jetegi bar qýatty keskish jumys organymen jabdyqtalǵan jáne ártúrli qattylyqtaǵy jynystardy óńdeýge beıimdelgen. Tehnıkanyń konstrýktsııalyq ereksheligi bıiktigi 5,5 metrge deıingi qazbalardy júrgizýge múmkindik beredi. Al buzylǵan jynys kiriktirilgen tıeý mehanızmi men konveıerlik júıe arqyly birden tasymaldaýǵa jiberiledi. Mundaı tehnologııa jumysshylardyń fızıkalyq júktemesin azaıtyp qana qoımaı, qazba júrgizý qarqynyn edáýir arttyrýǵa yqpal etedi.
«Shahtınsk» shahtasynyń №2 daıyndyq jumystary ýchaskesiniń bastyǵy Rústem Imanovtyń aıtýynsha, jańa tehnıka úńgý jumystaryn edáýir jeńildetedi.
- Mashınany paıdalaný jáne qyzmet kórsetý yńǵaıly. Burynǵy KSP-32 kombaınymen salystyrsaq, onda tek qolmen basqarý bolǵan. Al KP-21-de pýlt arqyly qashyqtan basqarý qarastyrylǵan, bul jumysty aıtarlyqtaı jeńildetedi, — dedi Rústem Imanov.
Bıyl Qarmet kompanııasynyń Kómir departamenti KP-21 úlgisindegi segiz jańa úńgý kombaınyn satyp alýdy josparlap otyr. Bul tehnıka departamentke qarasty ártúrli shahtalarǵa kezeń-kezeńimen jetkiziledi. Al 2026 jyly departamenttiń segiz shahtasynda shamamen 45 shaqyrym taý-ken qazbasyn júrgizý josparlanǵan.
Kompanııa mamandarynyń aıtýynsha, zamanaýı ótpeli kombaındardy engizý daıyndyq jumystarynyń joǵary qarqynyn saqtaýǵa múmkindik beredi. Sonymen qatar jańa tehnıka jerasty kómir óndirýdiń tıimdiligin arttyryp, óndiristik protsesterdiń qaýipsizdigi men turaqtylyǵyn qamtamasyz etýge yqpal etedi.
