Qarmet ózderi óndiretin metaldy paıdalana otyryp jańa kokstyq batareıalar salyp jatyr
TEMІRTAÝ. KAZINFORM – Qarmet metallýrgııalyq kombınatynda kásiporyndy keshendi jańǵyrtý baǵdarlamasy aıasyndaǵy strategııalyq jobalardyń biri – №8–9 jańa kokstyq batareıalar qurylysy qarqyndy júrip jatyr.
Aýqymdy jobanyń basty ereksheligi – bolashaq óndiristik keshenniń qurylysyna kompanııanyń óz óndirisinde shyǵarylǵan metall ónimderiniń qoldanylýynda. Búginde qurylys alańynda kásiporynnyń qoldanystaǵy qýattarynda óndirilgen A400 markaly myń tonnadan astam armatýra paıdalanylyp jatyr.
Strategııalyq mańyzy bar nysan qurylysynda ózderi óndiretin metaldy qoldaný Qarmet kompanııasynyń tolyq óndiristik tsıkldi meńgergenin aıqyn kórsetedi. Bul – shıkizatty óńdeý men bolat balqytýdan bastap, metallýrgııalyq keshendi damytýǵa tikeleı paıdalanylatyn daıyn prokat ónimderin shyǵarýǵa deıingi tutas óndiristik tizbektiń qalyptasqanyn bildiredi.
Kásiporyn úshin bul tásil tek óndiristik tıimdilik qana emes, uzaqmerzimdi damý strategııasynyń mańyzdy bóligi bolyp sanalady. Qarmet óz óndiristik múmkindikterin jetildirýmen qatar, kásiporyn qyzmetiniń nátıjesin qaıtadan óndiristi jańǵyrtýǵa baǵyttap otyr. Osylaısha zaýytta shyǵarylǵan ónim kombınattyń tehnologııalyq turǵydan jańarýyna berik negiz bolýda.
-A400 markaly armatýra óziniń joǵary beriktigimen, senimdiligimen jáne úlken júktemelerge tózimdiligimen erekshelenedi. Mundaı qasıetter iri ónerkásiptik nysandardy salý kezinde asa mańyzdy. Óıtkeni qurylys konstrýktsııalarynyń beriktigi bolashaq óndiristiń qaýipsizdigi men uzaq ýaqyt boıy turaqty jumys isteýine tikeleı áser etedi, – dep atap ótti Qarmet ókilderi.
№8–9 jańa kokstyq batareıalar jańartylǵan metallýrgııalyq óndiristik tizbektiń mańyzdy býynyna aınalmaq. Jobany iske asyrý koks-hımııa óndirisin jańǵyrtýǵa, domna óndirisiniń turaqty jumysyn qamtamasyz etýge jáne kásiporynnyń tehnologııalyq áleýetin odan ári nyǵaıtýǵa múmkindik beredi.
Jobany júzege asyrý barysynda qurylys materıaldarynyń sapasy men óndiristik sheshimderdiń tıimdiligine erekshe mán berilgen. Qarmet-tiń ózinde óndirilip shyǵarylǵan A400 markaly armatýra joǵary júktemeler túsetin jáne kúrdeli ónerkásiptik jaǵdaılarda paıdalanylatyn nysandarǵa qoıylatyn talaptarǵa tolyq sáıkes keledi.
Sonymen qatar kompanııa sortty prokat óndirisin damytý baǵytyn júıeli túrde jalǵastyryp keledi. Qoldanystaǵy óndiristik qýattardy tolyqtyrý maqsatynda Qarmet bıyl jylyna 540 myń tonna ónim shyǵarýǵa múmkindik beretin jańa ılemdeý stanynyń qurylysyn aıaqtaýdy josparlap otyr. Jańa óndiristik nysan ónim túrlerin keńeıtip qana qoımaı, onyń sapalyq kórsetkishterin jaqsartýǵa jáne A500, A1000 markaly joǵary suranysqa ıe armatýra óndirisin arttyrýǵa jol ashady.
Bul baǵyttyń damýy qurylys salasy, iri ınfraqurylymdyq jobalar jáne joǵary eksplýatatsııalyq qasıetterge ıe zamanaýı materıaldarǵa qajettilik artyp otyrǵan ónerkásiptik kásiporyndar úshin asa mańyzdy.
Búginde jańa kokstyq batareıalar qurylysy alańynda bolashaq óndiristik keshenniń negizi qalaný ústinde. Jobany júzege asyrý barysynda ózderi óndiretin metaldy paıdalaný Qarmet kompanııasynyń tehnıkalyq múmkindikterin ǵana emes, sonymen birge óz óniminiń sapasy men beriktigine degen joǵary senimin de kórsetedi.
№8–9 kokstyq batareıalardyń qurylysy metallýrgııalyq kombınatty keshendi jańǵyrtýǵa baǵyttalǵan aýqymdy baǵdarlamanyń bir bóligi bolyp tabylady. Kásiporyndy jańartý sheńberinde myryshtaý jáne polımerlik jabyndar óndirý jelisin salý, sortty prokat shyǵarý qýattaryn damytý, sondaı-aq quıý-prokat keshenin qurý sııaqty iri jobalar da júzege asyrylap keledi.
Atalǵan bastamalardyń barlyǵy óndiristik ınfraqurylymdy jańartýǵa, qosylǵan quny joǵary ónim kólemin arttyrýǵa jáne kásiporynnyń tehnologııalyq turaqtylyǵyn kúsheıtýge baǵyttalǵan. Qarmet-tiń aýqymdy transformatsııasynyń negizinde kompanııanyń ishki resýrstary, jyldar boıy jınaqtalǵan óndiristik tájirıbesi jáne joǵary bilikti ınjenerlik áleýeti jatyr.
