Qarmet mıllıardtaǵan shyǵynnan arylyp, taza paıdaǵa shyqty — Prezıdent
ASTANA. KAZINFORM — Memleket basshysy qabyldanǵan batyl sheshimder biregeı kombınattyń damýyna tyń serpin bergenin aıtty, dep habarlaıdy Aqordanyń baspasóz qyzmeti.
Prezıdent Qarmet kompanııasynyń buǵan deıingi jaı-kúıi kúrdeli bolǵanyna nazar aýdardy.
— Qabyldanǵan batyl sheshimder jaǵdaıdy ózgertip, osy biregeı kombınattyń damýyna tyń serpin berdi. Shyǵystardy ońtaılandyrý jáne ınvestıtsııa tartý arqyly kompanııa mıllıardtaǵan shyǵynnan arylyp, qıyn kezeńdi eńserdi. Osynyń nátıjesinde byltyr Qarmet 1,1 trıllıon teńge túsimmen taza paıdaǵa shyqty. Kásiporynda aýqymdy jańǵyrtý baǵdarlamasy qolǵa alyndy. Ony iske asyrýǵa 2028 jylǵa deıin 3,5 mıllıard dollar qarjy jumsalady. Óndiriske ozyq tehnologııalar men tsıfrlyq sheshimder engizýge aıryqsha mán berilýde. Jumysty uıymdastyrý jáne eńbek qaýipsizdigi máselesi erekshe baqylaýǵa alyndy, — dedi Memleket basshysy.
Qasym-Jomart Toqaevtyń aıtýynsha, búginde Qarmet bıznestiń joǵary deńgeıdegi áleýmettik jaýapkershiligi qandaı bolatynyn kórsetip otyr.
— Máselen, kásiporyn óz esebinen Temirtaýdaǵy tramvaı qozǵalysyn tolyq qalpyna keltirdi. Men álginde ǵana tramvaımen júrip kórip, atalǵan bastamany quptadym. Temirtaý turǵyndaryna tamasha tartý boldy dep oılaımyn. Kompanııa jas mamandardy oqytýǵa jáne jumyspen qamtýǵa arnalǵan «Bolashaqqa jol» áleýmettik baǵdarlamasyn qolǵa aldy. Birinshi kezeńde elimizdiń ár aımaǵynan 500-ge jýyq adam qamtylady. Bilikti mamandarǵa, ásirese, jumysshy mamandyq ıelerine suranys artyp keledi. Baǵdarlama, eń aldymen, osy údeden shyǵady. Bul bastamaǵa basqa da iri kásiporyndar qosylady dep úmittenemin, — dedi Prezıdent.
Buǵan deıin Memleket basshysyna № 8 jáne № 9 jańa koks batereıalarynyń qurylysy jóninde baıandalǵanyn jazǵanbyz.
