Qarmet metallýrgııalyq kombınatty gazdandyrýyn jalǵastyryp jatyr
QARAǴANDY. KAZINFORM — Qarmet kompanııasy aýqymdy jańǵyrtý baǵdarlamasyn júıeli túrde júzege asyryp keledi. 30 qyrkúıekte № 3 domna peshine tabıǵı gaz sátti jetkizildi.
Eske sala ketsek, budan bir aı buryn, 29 tamyzda, alǵash ret № 2 domna peshine jáne № 1 qańyltyr ılek tsehynyń ádistemelik peshterine kógildir otyn berilgen bolatyn. Bul — Temirtaý metallýrgııa kombınatynyń 80 jyldyq tarıhynda tuńǵysh ret domna óndirisin kezeń-kezeńimen gazdandyrýǵa bastaý bolǵan tarıhı qadam.
Gaz berý júıesi tolyq iske qosyldy. Injenerler úderistiń árbir sátin muqııat qadaǵalaıdy: otynnyń berilýi men janýynan bastap, shyǵyn ólshegishter men datchıkterdiń kórsetkishterine deıin. Zamanaýı tehnologııalardyń arqasynda árbir úrleýishke gazdy elektrıfıkatsııalanǵan klapandar arqyly bólek retteýge bolady. Bul barlyq parametrdi dál baqylap, ózgeristerge jedel áreket etýge múmkindik beredi.
— Árıne, jigitterdiń qýanyshy erekshe. Bul biz úshin domna óndirisindegi tyń sheshim. Árbir elementti qadaǵalaý mańyzdy. Biz bul tarıhı sátti uzaq kúttik: tabıǵı gaz — asyl otyn, ol bizge jańa múmkindikter ashady, — dedi № 3 domna peshiniń bastyǵy Aqan Espotaev.
Tabıǵı gazdy qoldaný alǵashqy nátıjesin berip úlgerdi. Qarmet kompanııasynyń bolat departamentiniń dırektory Andreı Berg buǵan deıin de tıimdiliktiń edáýir artqanyn atap ótken bolatyn.
— Biz qazirdiń ózinde tabıǵı gazdy paıdalanýdyń joǵary tıimdiligin kórip otyrmyz. Domna peshiniń ónimdiligi artty, ári eń bastysy — kokstyń shyǵyny aıtarlyqtaı azaıdy. Sonymen qatar, buryn barlyq domna peshterinde qoldanylyp kelgen mazýt tolyǵymen toqtatyldy. № 2 domna peshinde 29 tamyzdan beri mazýt múlde paıdalanylǵan joq, — dedi Andreı Berg.
Domna peshterinen bólek, tabıǵı gaz № 1 qańyltyr ılek tsehynyń ádistemelik peshterine de engizildi. Qazirgi tańda tórt agregattyń úsheýi jumys istep tur, olardyń saǵattyq shyǵyny shamamen 10 myń tekshe metr gazdy quraıdy. Bul sheshim peshterdiń temperatýralyq rejımin turaqtandyryp, slıabtardy qyzdyrý sapasyn jaqsartady. Sonyń nátıjesinde jalpy ılek ornaǵynyń jumysy tıimdi ári birqalypty bola túsýde.
Tabıǵı gazǵa kóshý strategııalyq turǵydan da aıryqsha mańyzdy. Ol metallýrgııalyq óndiristiń energııa tıimdiligin arttyryp, kokstyń shyǵynyn azaıtýǵa, mazýttan tolyq bas tartýǵa jáne qorshaǵan ortaǵa túsetin salmaqty tómendetýge múmkindik beredi. Qarmet úshin bul tek óndiristi ońtaılandyrý ǵana emes, sonymen qatar ekologııalyq turǵydan taza tehnologııalarǵa betburys. Bul álemdik metallýrgııa salasynyń qazirgi talaptaryna tolyq saı keledi. Al Temirtaý kombınaty úshin bul — jańa tehnologııalyq beles ári bolashaqtaǵy turaqty damý jolyn aıqyndaıtyn mańyzdy qadam.