Qarmet ujymdyq sharty Qazaqstanda úzdik tanyldy: Bul – adamdarǵa degen qamqorlyǵymyzdyń kórinisi
QARAǴANDY. KAZINFORM — Qyzmetkerlerdiń quqyǵy men áleýmettik kepildikteri — kompanııanyń basty basymdyǵy. Qarmet osy joldaǵy tabysyn «Paryz» konkýrsynda taǵy bir márte dáleldedi.
Qarmet kompanııasynyń ujymdyq sharty «Paryz» syılyǵynyń «Úzdik ujymdyq shart» nomınatsııasynda jeńimpaz atanyp, Qazaqstandaǵy eń ozyq korporatıvtik qujattardyń biri dep tanyldy. Bul marapat kompanııanyń áleýmettik jaýapkershilikke berik ekenin jáne qyzmetkerler aldyndaǵy mindettemelerin shynaıy oryndaýǵa umtylysyn aıqyn kórsetedi. Marapatty kompanııa atynan basqarma múshesi — Qarmet AQ basqarma tóraǵasynyń orynbasary Zaýre Zaýrbekova qabyldady.
-2024 jyldyń sońynda kompanııa áleýmettik seriktesterimiz — «Jaqtaý» jáne «Qorǵaý» salalyq kásipodaqtarymen ózekti ujymdyq shartqa qol qoıdy. Qujatta qyzmetkerler men olardyń otbasylaryn qoldaýdan bastap eńbek jaǵdaılaryn jaqsartý, medıtsınalyq qoldaý, kadrlyq áleýetti damytý, áleýmettik kepildikter jáne taǵy basqa kóptegen baǵyttar qamtylǵan. Qujatty ázirleý uzaq ýaqyt boıy júrgizildi jáne birlesken eńbektiń nátıjesinde biz ózimizdiń úlken eńbek ujymyn qoldaýǵa arnalǵan jańa ujymdyq shartty jasap shyqtyq, — dedi Zaýre Zaýrbekova.
Qarmet ujymdyq sharty qyzmetkerlerdiń ómir sapasyn arttyrýǵa baǵyttalǵan keń aýqymdy kepildikterdi qamtıdy. Qujatta negizgi óndiristik kórsetkishter oryndalǵan jaǵdaıda jyl qorytyndysy boıynsha bir rettik syıaqy, eńbek ótili men kásibı sheberligi úshin ústemaqylar, sondaı-aq qaýipsiz eńbek úshin yntalandyrý tólemderi qarastyrylǵan. Mundaı yntalandyrýlar eńbek qaýipsizdigi mádenıetin turaqty damytýǵa jáne qyzmetkerlerdiń jaýapkershiligin arttyrýǵa yqpal etedi.
Sonymen qatar, Metallýrg kúni men Shahter kúni resmı merekelik kúnder retinde bekitilgen. Bul kúnderi jumys istegen qyzmetkerlerdiń eńbegi joǵarylatylǵan mólsherde tólenedi, bul kompanııanyń eńbek dástúrlerine jáne qyzmetkerlerdiń eńbegine degen qurmetin kórsetedi.
«Paryz» baıqaýyndaǵy jeńis — Qarmet kompanııasynyń júıeli áleýmettik saıasat júrgizetinin, laıyqty eńbek jaǵdaılaryn jasap, qurmet pen jaýapkershilik qaǵıdattaryn nyǵaıtýǵa baǵyttalǵanyn kórsetedi. Bul marapat kompanııanyń qyzmetkerlerge degen senimin arttyrýǵa, áleýmettik standarttardy odan ári kúsheıtýge jáne Qazaqstandaǵy taý-ken, metallýrgııa salasynda úlgi bolýǵa degen umtylysyn rastaıdy.
Bıylǵy «Paryz» baıqaýyna elimizdiń ár aımaǵynan kóptegen uıymdar qatysty. Qarmet kompanııasy óziniń kásibı daıyndyq deńgeıi men áleýmettik jaýapkershilik mádenıeti arqyly úzdik dep tanylyp, baıqaý qazylar alqasynyń joǵary baǵa alǵany kompanııa úshin mańyzdy mártebe boldy. Bul jetistik qyzmetkerlerdiń yntasyn arttyrýǵa, korporatıvtik mádenıetti odan ári damytýǵa jáne jańa áleýmettik bastamalardy engizýge septigin tıgizedi.