Bir aıda 447 metr: Qarmet kenshileri birlikpen rekordqa qol jetkizýge bolatynyn dáleldedi
QARAǴANDY. KAZINFORM – Qarmet kompanııasynyń «Shahtınskaıa» shahtasynda kenshiler taǵy bir tarıhı jetistikke qol jetkizdi. Bir aıdyń ishinde úńgýshiler brıgadasy júzdegen metr kómir qabatyn jaryp ótip, ózderiniń aldyńǵy kórsetkishin birneshe ese jańartty. Bul jetistik – kásibılik pen uıymshyl eńbektiń aıqyn kórinisi.
Kompanııanyń málimetinshe, Sergeı Terehov basqaratyn úńgýshiler toby bir aıda 447 metr kómir qabatyn qazyp shyqqan. Bul – shahtadaǵy ortasha kórsetkishten úsh esege jýyq artyq nátıje. Ádette mundaı kólem aıyna 120–150 metr shamasynda bolady. Terehovtyń aıtýynsha, mundaı joǵary kórsetkishke jaýapkershilik pen birlesken eńbek arqasynda qol jetkizilgen.
– Bizdiń ujymymyz óte tatý. Barlyǵyn aldyn ala josparlap, daıyndyq jumystaryn sapaly atqardyq: sý men syǵylǵan aýa jetkizdik, metall men balkalardy aldyn ala daıyndap qoıdyq. Ár aýysymda óz baǵytyna jaýapty zvenoshy boldy. Osyndaı úılesimdi jumys nátıjesinde maqsatqa jettik, – deıdi 30 jyldyq eńbek ótili bar tájirıbeli brıgadır Sergeı Terehov.
Brıgadanyń basty mindeti qysqa merzim ishinde 28-D1,2 lavasyna arnalǵan jańa jeldetkish shtrekti daıyndaý edi. Alaıda jumys aımaǵy tehnıkalyq turǵydan kúrdeli bolyp shyqqan: sý kirgendikten tóbe men taban bóligi bosap, qaýipsizdik deńgeıi tómendegen. Osyǵan baılanysty shahta basshylyǵy eń qıyn ýchaskeni aınalyp ótip, jumysty basqa baǵyttan júrgizý týraly sheshim qabyldaǵan. Nátıjesinde lavanyń uzyndyǵy 40 metrge qysqardy, bul óz kezeginde óndiris qaýipsizdigin arttyryp, turaqty jumys júrgizýge múmkindik berdi.
Búginde «Shahtınskaıa» shahtasynda eki negizgi lava – №12 jáne №28 jumys istep tur. Árqaısysynyń uzyndyǵy shamamen 270 metr, al qorlary tıisinshe 400 jáne 500 myń tonna kómirge baǵalanǵan. Sonymen qatar №16 jáne №26 jańa lavalaryn daıyndaý jumystary bastalǵan. Kómir qabatyna tikeleı kirý ýchaskesiniń túri jumys qarqynyna aıtarlyqtaı áser etedi: kómir qabaty boıymen qazý jeńildeý bolsa, qatparly jynystarda aýyr tehnıka men qosymsha qaýipsizdik sharalary qajet.
– Terehovtyń brıgadasy aralas ýchaskede jumys istedi, túrli bekitý ádisterin qoldandy. Ujymdy 56 adamǵa deıin tolyqtyrdyq. Erekshe eńbek nátıjesi úshin barlyǵyna syıaqy beriledi, – deıdi «Shahtınskaıa» shahtasynyń dırektory Denıs Dymov.
Onyń aıtýynsha, sońǵy jyldary Qarmet shahtalarynda zamanaýı baılanys júıeleri men tsıfrlyq tehnologııalar belsendi engizilip jatyr. Metan kontsentratsııasyn, temperatýrany jáne ózge de parametrlerdi naqty ýaqyt rejıminde baqylaıtyn datchıkter ornatylǵan. Bul qaýipsizdikti kúsheıtip qana qoımaı, eńbek ónimdiligin de arttyrady.
Úńgýshiler brıgadalary kompanııanyń jalpy kómir óndirý kólemine eleýli úles qosyp otyr. Árbir metr – bul tek qara kúshtiń ǵana emes, sonymen qatar tájirıbe, tártip pen ózara túsinistiktiń jemisi.
«Shahtınskaıa» shahtasyndaǵy jańa rekord Qarmet ujymynyń áleýetin aıqyn kórsetti. Kúrdeli geologııalyq jaǵdaı men joǵary qaýipsizdik talaptaryna qaramastan, kásibı jáne uıymshyl eńbek arqyly erekshe nátıjelerge qol jetkizýge bolatynyn dáleldedi.
Aıta ketsek, buǵan deıin Qarmet kompanııasy ystyq myryshtaý jáne polımerli jabyndar kesheniniń qurylysyn bastaǵan bolatyn.