Qarmet ystyq myryshtaý jáne polımerli jabyn kesheni qurylysyn bastady
QARAǴANDY. KAZINFORM – 10 qazanda Qarmet metallýrgııa kombınatynda ystyq tásilmen úzdiksiz myryshtaý jáne polımerli jabyn jaǵý boıynsha jańa keshenniń qurylysy bastaldy.
Osylaısha Qazaqstan metallýrgııasy jańa tehnologııalyq deńgeıge qadam basty. Qaraǵandydaǵy keshen bolat óndirisin arttyryp, ımportqa táýeldilikti azaıtýǵa múmkindik beredi. Bul – Memleket basshysy Qasym-Jomart Toqaevtyń tapsyrmasyna sáıkes júzege asyrylyp jatqan kompanııanyń bolat óndirý dıvızıonyn jańǵyrtýdyń aýqymdy baǵdarlamasyndaǵy basty baǵyttardyń biri.
Halyqaralyq tenderdiń qorytyndysy boıynsha Qarmet seriktesi retinde Belgııanyń ınjenerlik kompanııasy John Cockerill tańdaldy. Álemdik deńgeıdegi atalǵan kompanııa ystyq jáne sýyq ılek, úzdiksiz myryshtaý jáne polımerli jabyn jaǵý tehnologııalary salasynda kóshbasshy sanalady. Onyń jabdyqtary Eýropa, Azııa jáne Taıaý Shyǵystyń iri metallýrgııalyq kásiporyndarynda qoldanylady jáne ónim sapasyn arttyryp, óndiris tıimdiligin qamtamasyz etedi.
Búginde Qarmet qurylymynda jylyna 592 myń tonna ónim shyǵaratyn eki ystyq myryshtaý jelisi jáne 115 myń tonna ónim óndiretin polımerli jabyn jelisi jumys isteıdi. Al jańa keshen iske qosylǵan soń, kásiporyn jyl saıyn 844 myń tonna myryshtalǵan bolat pen 254 myń tonna polımerli jabyndy bolat shyǵara alady. Sondaı-aq ónimniń qalyńdyǵy men endik ólshemderi keńeıip, naryqtyń jańa segmentterin qamtýǵa jol ashylady.
Jańa óndiristik torap Qarmet kásipornyndaǵy tehnologııalyq jańǵyrýdyń ózegine aınalmaq. Ol qurylys, mashına jasaý jáne ınfraqurylym salalaryna arnalǵan otandyq, básekege qabiletti ári ımportty almastyratyn ónim shyǵarýǵa múmkindik beredi. Osylaısha, Qazaqstan ishki naryqty zamanaýı myryshtalǵan jáne polımerli jabyndy bolatpen tolyq qamtamasyz etip, eksporttyq áleýetin arttyra alady.
Jobanyń jalpy ınvestıtsııalyq kólemi – shamamen 84 mıllıard teńge. Keshenniń iske qosylýy 2027 jylǵa josparlanǵan. Onyń júzege asyrylýy nátıjesinde shamamen 350 jańa jumys orny ashylyp, óndiris kólemi men ónim sapasy edáýir artady.
Kompanııa ókilderiniń aıtýynsha, bul – tek jańa jabdyq ornatý jobasy emes, otandyq metallýrgııanyń bolashaǵyna baǵyttalǵan strategııalyq ınvestıtsııa.
– Qarmet turaqty damý men jańǵyrtý strategııasyn kezeń-kezeńimen júzege asyryp keledi. Bizdiń maqsatymyz – óndiris qýatyn arttyryp qana qoımaı, qazaqstandyq bolat sapasyn jańa deńgeıge shyǵarý, - dep atap ótti kásiporynnyń baspasóz qyzmetinen.
Osylaısha eldiń bolat ındýstrııasyn sapalyq jańa deńgeıge kóterip, qazaqstandyq ónimdi jahandyq naryqta básekege qabiletti etýge baǵyttalǵan mańyzdy qadam jasalyp otyr. Ystyq myryshtaý jáne polımerli jabyn kesheniniń qurylysy Qaraǵandynyń Qazaqstan metallýrgııasynyń basty ortalyǵy ekenin taǵy bir márte dáleldeı tústi.
Aıta ketsek, buǵan deıin Qarmet metallýrgııa kombınatyn gazdandyrýdyń aýqymdy baǵdarlamasy júıeli túrde júzege asyrylyp kele jatqany habarlanǵan bolatyn.