Qarmet INNOPROM-2026 kórmesinde tsıfrlyq sheshimderin tanystyrdy
TEMIRTAÝ. KAZINFORM — Qarmet kompanııasy 6-9 shilde aralyǵynda Ekaterınbýrg qalasynda ótip jatqan XVI INNOPROM-2026 halyqaralyq ónerkásiptik kórmesine qatysyp jatyr.
Ónerkásip salasyndaǵy eń iri halyqaralyq alańdardyń biri sanalatyn forýmǵa álemniń 50-den astam elinen kelgen ókilder jınaldy. Ulttyq ekspozıtsııalaryn Qazaqstan, Indonezııa, Belarýs, Qyrǵyzstan jáne Ózbekstan usyndy.
Kórmege Reseı, Qazaqstan, Armenııa, Belarýs jáne Qyrǵyzstan úkimetteriniń basshylary — Mıhaıl Mıshýstın, Oljas Bektenov, Nıkol Pashınıan, Aleksandr Týrchın jáne Ádilbek Qasymalıev qatysty. Іskerlik baǵdarlamaǵa sondaı-aq Indonezııa, Iran, Túrikmenstan, Tájikstan, Ózbekstan, Birikken Arab Ámirlikteri, Vetnam jáne basqa da memleketterdiń úkimet ókilderi qatysyp, forýmnyń halyqaralyq mańyzyn jáne ónerkásip salasyndaǵy ozyq tájirıbelermen almasýǵa arnalǵan tıimdi alań ekenin taǵy bir márte aıqyndady.
Qazaqstandyq delegatsııa quramynda Qarmet óndiristegi qaýipsizdik pen tıimdilikti arttyrýǵa baǵyttalǵan tsıfrlyq sheshimderin tanystyrdy. Kompanııa barlyq kómir shahtalarynda engizgen personaldy pozıtsııalaý júıesi men beınetelematıka júıesi kórmeniń negizgi tehnologııalyq ázirlemeleri qatarynda boldy. Bul sheshimder búginde kásiporynnyń óndiristik nysandarynda qoldanylyp, kompanııanyń tsıfrlyq transformatsııasynyń mańyzdy quramdas bóligine aınalǵan.
Usynylǵan tehnologııalar óndiristik qaýipsizdik deńgeıin arttyrýǵa, óndiristik protsesterdi jedel baqylaýǵa jáne tótenshe jaǵdaılar týyndaǵan kezde áreket etý ýaqytyn qysqartýǵa múmkindik beredi. Sonymen qatar olar óndiristik úderisterdiń senimdiligi men tıimdiligin qamtamasyz etýge yqpal etedi.
— Bıyl kórmede naqty ýaqyt rejıminde jerasty qazbalaryndaǵy qyzmetkerlerdiń ornalasqan jerin anyqtaýǵa, gazdaný deńgeıi men óndiristik úderisterdi baqylaýǵa múmkindik beretin pozıtsııalaý júıesin tanystyrdyq. Tótenshe jaǵdaılar týyndaǵan kezde bul tehnologııa qyzmetkerlerdiń naqty ornalasqan ornyn jedel anyqtaýǵa, olarmen baılanys ornatýǵa jáne avarııalyq-qutqarý bólimsheleriniń is-qımyldaryn úılestirýge kómektesedi. Biz kómir óndirisin tsıfrlandyrý salasyndaǵy tájirıbemizdi halyqaralyq alańda tanystyryp, jetekshi ónerkásiptik kompanııalarmen ozyq tájirıbe almasqanymyzǵa qýanyshtymyz. Qarmet úshin zamanaýı tehnologııalardy engizý — eń aldymen qyzmetkerlerdiń qaýipsizdik deńgeıin arttyrý, óndiris tıimdiligin, tehnologııalyq úderisterdiń senimdiligin jáne eńbek jaǵdaılaryn jaqsartý degen sóz, — dedi Qarmet kompanııasynyń turaqty damý jáne strategııalyq kommýnıkatsııalar jónindegi basqarýshy dırektory Erbol Ismaılov.
INNOPROM-2026 kórmesine qatysý Qarmet kompanııasyna taý-ken óndirisin tsıfrlandyrý salasyndaǵy praktıkalyq tájirıbesin halyqaralyq kásibı qaýymdastyqqa tanystyrýǵa, kompanııanyń tehnologııalyq áleýetin kórsetýge jáne qyzmetkerlerdiń qaýipsizdigin arttyrýǵa, óndiris tıimdiligin kúsheıtýge ári kásiporynnyń turaqty damýyn qamtamasyz etýge baǵyttalǵan zamanaýı sheshimderdi engizý jónindegi strategııalyq baǵytyn taǵy bir márte rastaýǵa múmkindik berdi.
