Qarmet eńbek ujymy jańa Konstıtýtsııa boıynsha referendým ótkizýdi qoldaıdy
QARAǴANDY. KAZINFORM – «Qarmet» AQ dırektorlar keńesiniń tóraǵasy, Konstıtýtsııalyq reforma jónindegi komıssııanyń múshesi Andreı Lavrentev metallýrgııalyq kombınattyń eńbek ujymymen kezdesti.
Ashyq formatta ótken júzdesý barysynda Qazaqstan Respýblıkasynyń jańa Konstıtýtsııasy jobasynyń negizgi qaǵıdattary men normalary, sondaı-aq olardyń el damýyna, ónerkásiptiń órkendeýine, quqyqtyq memleketti nyǵaıtýǵa jáne eńbek adamynyń quqyqtaryn qorǵaýǵa yqpaly keńinen talqylandy.
«Jańa Konstıtýtsııa – elimizdiń bolashaǵyn aıqyndaıtyn berik quqyqtyq tuǵyr. Onyń ózeginde ádilettilik, zań ústemdigi jáne adamǵa qurmet qaǵıdattary jatyr. Ásirese eńbek adamdary úshin memleket tarapynan barshaǵa birdeı ári túsinikti erejelerdiń qamtamasyz etilýi, azamattardyń quqyqtary qorǵalýy jáne damýǵa teń múmkindikterdiń jasalýy asa mańyzdy. Osyndaı qaǵıdattar negizinde ǵana qýatty, ornyqty ári ádiletti memleket qalyptasady», - dep atap ótti Lavrentev.
Memleket basshysy otandyq ónerkásiptiń tirek kásiporyndarynyń biri sanalatyn, el ekonomıkasynyń damýyna qomaqty úles qosyp otyrǵan Qarmet ujymynyń eńbek jetistikterin joǵary baǵalaıdy.
35 myń adamnan turatyn Qarmet eńbek ujymy júrgizilip jatqan reformalardy jáne aldaǵy referendýmdy qoldaıtynyn bildirdi. Ujym ókilderi Konstıtýtsııany jańartý qazirgi qoǵamnyń negizgi qundylyqtaryn – zań men tártipti, adam men azamattyń basymdyǵyn, jeke tulǵanyń ar-namysy men qadir-qasıetin qorǵaýdy, eńbek etý quqyǵyn, bilim alý jáne kásibı turǵyda damýǵa múmkindik berýdi aıqyndaıtynyn atap ótti.
Metallýrgter Konstıtýtsııalyq deńgeıde adamǵa baǵdarlanǵan ustanymdy bekitý quqyqtyq kepildikterdi kúsheıtip, ádil ári boljamdy qoǵamdyq-ekonomıkalyq orta qalyptastyratynyn, ózara senimdi nyǵaıtyp, ónerkásiptiń ornyqty damýyna serpin beretinin jetkizdi.
Kompanııa ujymy atynan bolat departamentiniń dırektory, jalpy eńbek ótili 150 jyldan asatyn metallýrgter áýletiniń ókili Andreı Berg sóz sóıledi: «Biz elde júzege asyrylyp jatqan reformalardy tolyq qoldaımyz. Jańa Konstıtýtsııa turaqtylyqtyń, ádilettiliktiń jáne damýdyń uzaq merzimdi negizin qalyptastyratyny biz úshin mańyzdy. Óz tarapymyzdan adal eńbek etip, ónerkásiptik áleýetti nyǵaıtýdy ári elimiz ben kompanııamyzdyń órkendeýine úles qosýdy jalǵastyra beremiz».
Búginde Qarmet kompanııasy óndiristik qýattardy tehnologııalyq turǵydan jańartýǵa, tıimdilikti arttyrýǵa jáne adamı kapıtaldy damytýǵa baǵyttalǵan «5-9-5» uzaq merzimdi jańǵyrtý baǵdarlamasyn júzege asyrýda. Baǵdarlama aıasynda kadr daıarlaý, qyzmetkerlerdiń biliktiligin arttyrý jáne zamanaýı qaýipsizdik standarttaryn engizý máselelerine aıryqsha basymdyq berilgen. Bul baǵyttar bilim men ǵylymdy, ınnovatsııalardy damytýǵa negizdelgen memlekettik saıasatpen tolyq úndesedi.
Kásiporyn ujymy referendýmǵa qatysýdy joǵary azamattyq jaýapkershiliktiń jáne el bolashaǵyn aıqyndaýǵa sanaly túrde atsalysýdyń kórinisi retinde baǵalaıdy. Metallýrgter jańa Konstıtýtsııa Qazaqstannyń memlekettiligin nyǵaıtýǵa, eńbek adamynyń quqyqtaryn qorǵaýǵa jáne eldiń uzaq merzimdi, turaqty damýyn qamtamasyz etýge berik negiz bolatynyna senim bildirdi.
- Jańa Konstıtýtsııany qoldaımyz! - dep málim etti kompanııadan.