Qarmet-tiń eki jyly: ósim, tehnologııalar jáne jańa qýat
QARAǴANDY. KAZINFORM — 2025 jylǵy 8 jeltoqsanda Qarmet damýdyń jańa kezeńine ótkenine eki jyl tolady, bul — kompanııanyń tehnologııalyq jańarýy men óndiristik áleýetin kúsheıtý úshin sheshýshi mańyzǵa ıe ýaqyt.
Osy aralyqta taý-ken metallýrgııa kesheni protsesterdi turaqtandyrýdan aýqymdy jańǵyrtýǵa ótip, damý baǵdarlamasyn eldiń ózekti ónerkásiptik basymdyqtarymen jáne QR Prezıdenti Qasym-Jomart Kemeluly Toqaev qoıǵan mindettermen sáıkestendirdi.
Kompanııanyń jetistikteri
Eki jyl jedel ósim kezeńine aınaldy. Qatty bolat óndirisi 22%-ǵa, kómir kontsentratynyń shyǵarylymy 26%-ǵa, al temir rýdasy kontsentraty 32%-ǵa artty. Kompanııa jóndeý baǵdarlamasyn kúsheıtip, óndiristik tizbektiń erekshe mańyzdy ýchaskelerin qalpyna keltirdi, jabdyq pen kommýnıkatsııalardy jańǵyrtty. Bul qadamdar óndiris jumysyn turaqtandyrýǵa jáne iri jobalarǵa negiz qalady.
Metallýrgııalyq kombınatty gazdandyrýdyń birinshi kezeńiniń aıaqtalýy salanyń ekologııalyq transformatsııasyndaǵy asa mańyzdy qadam boldy. Domna óndirisi birneshe onjyldyqta alǵash ret tolyqtaı tabıǵı gazǵa kóship, qorshaǵan ortaǵa túsetin júktemeni aıtarlyqtaı azaıtty. Kombınattyń basqa da tsehtaryn qosý josparlanýda.
2025 jyly eń basty basymdyq — eńbek qaýipsizdigi boldy. Kompanııa shahtalary endi qyzmetkerlerdi dál anyqtaıtyn zamanaýı pozıtsııalaý júıesimen jáne jerasty men jerústi protsesterin biriktiretin jańartylǵan tsıfrlyq dıspetcherlik ortalyqpen jabdyqtalǵan. Bul sharalar naqty ýaqyt rejıminde jedel baqylaýdy qamtamasyz etip, óndiristik táýekelderdi edáýir tómendetti. Bıyl kompanııa taý-ken ónerkásibi qyzmetkerlerine arnalǵan óndiristik medıtsınany qaıta jandandyryp, Qaraǵandy qalasynda klınıkalyq-dıagnostıkalyq ortalyq ashty, ol profıldik qyzmetterdi tegin usynady.
Maýsym aıynda kásiporynda bolyp qaıtqan QR Premer-Mınıstri Oljas Bektenov qabyldanyp jatqan sharalardyń mańyzdylyǵyn atap ótip, kompanııanyń ilgerileýin joǵary baǵalady:
«Qazir jańa ulttyq ınvestor jańǵyrtýǵa zor qarajat quıýda. Shahtada beınebaılanys, gaz jáne seısmodatchıkter, kenshilerdi pozıtsııalaý júıesi engizilip jatyr. Derbes apattyq belgi berý qurylǵylary men beınebaılanys sııaqty qarapaıym nárselerdiń ózi buryn bolmaǵan», — dedi Úkimet basshysy.
Tsıfrlandyrý jyl basymdyqtarynyń birine aınaldy: óndiriske ónerkásiptik analıtıka júıeleri, jasandy ıntellekt jáne tsıfrlyq modeldeý engizilýde. Jabdyqtar predıktıvti baqylaýǵa kóshirilip, tehnologııalyq protsesterdi onlaın-monıtorıngteý jelisi keńeıtilýde, negizgi agregattardyń tsıfrlyq egizderi jasalýda. Bul apattylyqty azaıtady, óndiris tıimdiligin arttyrady jáne júıeli jańǵyrtý úshin tehnologııalyq negiz qalaıdy.
Jańa qýattar jáne múmkindikter
2025 jyl aýqymdy qurylys jumystarymen este qalmaq. Kompanııa 65 jyl qoldanylǵan agregattardy almastyratyn jańa № 8–9 koksteý batareıalaryn salýdy bastady, olar jylyna 1,5 mln tonna qurǵaq koks óndirýge múmkindik beredi. Erekshe oryn — 15-ten astam ónim túrin shyǵaratyn kómirhımııa jobalarynyń iske qosylýy. Sonymen qatar, ystyq myryshtaý jáne polımerli qaptaý jelisiniń, sortty ılemdik ornaq qurylysy bastaldy — bul joǵary qosylǵan quny bar metall shyǵarýǵa jol ashady. Jańa quıý-prokat keshenin salý da jalǵasýda — bul bolashaqta premıým segmenttegi bolat óndirisin arttyryp, eksporttyq áleýetti edáýir kúsheıtetin joǵary tehnologııalyq óndiris.
2025 jyly 7 mln tonnadan astam qaıtalama ónim qaıta óńdeldi, jyldyń sońyna deıin bul kórsetkish 8 mln tonnaǵa jetedi dep boljanýda. Aýdany 40 myń sharshy metr bolatyn jáne táýligine 300 tonnaǵa deıin qabyldaıtyn jańa metall synyqtaryn óńdeý alańy ashyldy. Jol qurylysy men ózge de salalarda qaıtalama shıkizatty qoldaný boıynsha jańa kelisimder jasalyp, bul ekologııalyq turaqtylyqty jáne kásiporynnyń ekonomıkalyq tıimdiligin arttyrady.
Adam kapıtaly jáne óńirler
Bıyl kompanııanyń bolashaq kadrlaryn daıarlaıtyn oqý korpýsynyń jóndeýi aıaqtaldy. Qarmet University búginde qyzmetkerlerdi keshendi oqytýǵa jáne kásibı damytýǵa arnalǵan tolyqqandy ortalyqqa aınaldy. Jańǵyrtý aıasynda óndiristik protsesterdi dál modeldeıtin joǵary tehnologııalyq trenajerlar satyp alyndy.
Kompanııa óńirlerdegi iri áleýmettik bastamalardy da iske asyrýda. Qatysý qalalarynda densaýlyq saqtaý, bilim berý jáne sportty qamtıtyn jobalar júzege asýda. Mysaly, Qarajal qalasynda quny 500 mln dollardan asatyn ınfraqurylymdy jańartý jáne jańa fabrıkalar ashý baǵdarlamasy jalǵasyp jatyr.
Kompanııa jumys berýshilerdiń ulttyq tartymdylyq reıtınginde 15 orynǵa kóterilip, TMK sektorynda 7-oryndy ıelendi. 2025 jyly kásiporyn «saladaǵy eń úzdik digital-sheshim» úshin «Altyn Gefest» syılyǵyn jáne «Paryz» konkýrsynda «Úzdik ujymdyq shart» nomınatsııasynda jeńiske jetti.
«Bizdiń eki jyl — úlken ózgerister kezeńi. Biz Memleket basshysy qoıǵan mindetterdi oryndaımyz, qaýipsizdikti kúsheıtemiz, óndiristi jańǵyrtamyz jáne jańa baǵyttar ashamyz. Qarmet-tiń basty kapıtaly — adamdar. Metallýrgter, kenshiler, ınjenerler, jóndeý qyzmetteri men jobalyq komandalar — kompanııanyń búgingi turaqty ósiminiń negizi. Biz Qazaqstanǵa uzaq jyldar qyzmet etetin bolashaqtyń kásipornyn quryp jatyrmyz», — dep atap ótti kompanııa ókilderi.
2025 jyl Qarmet strategııasynyń naqty júzege asqan jyly boldy: jańa nysandar, óndiristik kórsetkishterdiń ósýi, qaýipsizdiktiń kúsheıýi, ekologııalyq sheshimder jáne áleýmettik jobalar. Kompanııa óz tarıhyna qurmetpen qaraı otyryp, Qazaqstannyń berik bolat qańqasyn qalyptastyra otyryp, alǵa nyq qadammen jyljyp keledi.