Qarmet dıspetcherlik ortalyǵy: Kenshilerdiń qaýipsizdigin kúzetken tsıfrlyq júıe
QARAǴANDY. KAZINFORM — Kómir ónerkásibinde qaýipsizdik árdaıym basty qundylyq sanalady. Búginde kenshilerdiń tájirıbesi men sheberligin zamanaýı tsıfrlyq tehnologııalar tolyqtyryp otyr.
Qaraǵandyda iske qosylǵan Qarmet dıspetcherlik-taldamalyq ortalyǵy — shahtalardyń barlyq úderisin naqty ýaqyt rejıminde baqylaıtyn jáne qyzmetkerlerdiń jumysyn úılestiretin biryńǵaı júıe.
Ortalyq kómir departamentiniń naǵyz «zııalkerlik negizine» aınaldy. Munda qazaqstandyq IT-mamandar ázirlegen DMMS óndiristi basqarýdyń ınnovatsııalyq júıesi ornatylǵan. Ol monıtorıng, taldaý jáne baılanysty biriktirip, yqtımal qaterlerdi aldyn ala anyqtap, tótenshe jaǵdaılardyń aldyn alýǵa múmkindik beredi.
Táýlik boıy baqylaý
Barlyq shahtalardan túsetin aqparat bir ortalyqqa kidirissiz jetkiziledi. Úlken ekrandardan dıspetcherler jabdyqtardyń jumysyn, gaz deńgeıin, jeldetý júıesiniń jaǵdaıyn, kenshiler men tehnıkanyń ornalasýyn baqylaıdy. Qajet bolǵan jaǵdaıda jer astyndaǵy mamandarmen beınebaılanysqa shyǵyp, dereý nusqaý berýge múmkindik bar.
Ortalyqtyń negizgi múmkindikteri:
- Ortalyqtandyrylǵan monıtorıng — barlyq shahtalar biryńǵaı júıege qosylǵan;
- Pozıtsııalaý júıesi — qyzmetkerler men tehnıkanyń qozǵalysyn jer betinde de, jer astynda da qadaǵalaıdy;
- Avarııalyq habarlama — brıgadany nemese jekelegen mamandy lezde eskertýge múmkindik beredi;
- Beınebaılanys — jer asty Wi-Fi men qorǵalǵan smartfondar arqyly júzdegen metr tereńdikte baılanys ornatýǵa bolady;
- Qorshaǵan ortany baqylaý — gaz deńgeıin, otteginiń quramyn jáne jeldetý júıesin tekserip, qaýipti jaǵdaılardyń aldyn alady.
Artyqshylyqtary
Júıeniń basty tıimdiligi — jyldam áreket etý múmkindigi. Buryn qaýip týraly aqparat keshigip jetse, qazir eń az aýytqýdyń ózi birden tirkelip, sıgnal ortalyqqa túsedi. Bul máseleni jumysshylarǵa qaýip tóndirmeı turyp sheshýge jaǵdaı jasaıdy.
Sonymen qatar tsıfrlyq baqylaý óndiristiń tıimdiligin arttyrady. Pozıtsııalaý júıesi qyzmetkerlerdiń qaı jerde, qansha ýaqyt jumys istegenin jáne tehnıkanyń qalaı paıdalanylyp jatqanyn kórsetedi. Bul — resýrstardy durys bólýge, artyq shyǵyndy azaıtýǵa jáne jumys barysyn ashyq júrgizýge múmkindik beredi.
Kenshiler úshin mundaı júıe — senimdi qorǵan. Olar óz eńbeginiń zamanaýı tehnologııalarmen qorǵalǵanyn biledi. Al kásiporyn úshin — apattylyqtyń tómendeýi, toqtap qalýdyń azaıýy jáne ónimdiliktiń ósýi.
Damý keleshegi
2025 jyldyń sońyna deıin Qarmet kómir departamentiniń barlyq segiz shahtasy pozıtsııalaý júıesimen qamtylady. Bolashaqta fýnktsıonaldy keńeıtip, jańa taldaý jáne boljaý modýlderin qosý, úlken derekter arqyly táýekelderdi aldyn ala boljaý kózdelgen.
Qarmet dıspetcherlik-taldamalyq ortalyǵy Qazaqstandaǵy kómir salasyn tsıfrlandyrýdyń mańyzdy kezeńine aınaldy. Bul — jaı ǵana dıspetcherlik emes, qaýipsizdik, taldaý jáne basqarýdy biriktirgen joǵary tehnologııalyq keshen.
Kenshiler úshin bul — áriptesteriniń tájirıbesimen qatar, árbir úderisti táýlik boıy qadaǵalap, eńbekterin anaǵurlym qaýipsiz ári senimdi etetin tsıfrlyq qalqan turǵanyn bildiredi.