Qarmet bolaty QazTehna avtobýstarynyń bólshegine aınaldy
SARAN. KAZINFORM — Otandyq metallýrgııa ónimi búginde Temirtaýda óndirilgen bolattan Saran qalasynda qurastyrylatyn avtobýstardyń daıyn shanaq bólshekterine deıingi óndiristik tizbektiń bir bóligine aınalyp otyr.
QazTehna zaýytynda Qarmet óndiretin myryshtalǵan bolat 2025 jyly iske qosylǵan kásiporynnyń jeke shtamptaý óndirisinde óńdeledi. Óndiristik kooperatsııa nátıjesinde avtobýstar qurastyrýdaǵy jergilikti qamtý úlesi 11%-dan astam ósip, shanaq bólshekterin ımporttaý qajettiligi azaıǵan.
Qarmet otandyq mashına jasaý kásiporyndaryn myryshtalǵan bolatpen qamtamasyz etedi. Osyndaı óndiristik kooperatsııanyń naqty mysalynyń biri — metallýrgııalyq kombınat óniminiń QazTehna zaýytynda avtobýs shanaǵynyń bólshekterin jasaýǵa qoldanylýy.
2025 jyly kásiporynda Qazaqstanda alǵash ret qysym kúshi 1100 tonna bolatyn gıdravlıkalyq shtamptaý presi iske qosyldy. Jańa jabdyqtyń kómegimen shanaqtyń negizgi metall bólshekterin — tóbesin, búıir panelderin, tireýlerin, qaptama elementterin jáne basqa da quramdas bólikterin kásiporynnyń ózinde óndirýge múmkindik týdy.
Shtamptaý óndirisinde Qarmet shyǵaratyn 08PS jáne 08KP markaly myryshtalǵan bolat paıdalanylady. Qalyńdyǵy ártúrli metall qalalyq, týrıstik jáne mektep avtobýstaryna arnalǵan bólshekterdi daıyndaýǵa jumsalady.
«QazTehna» JShS óndiris jónindegi dırektory Aleksandr Mızgýlınniń aıtýynsha, otandyq metaldy óńdeý úderisi bolat tabaqty daıyndaýdan bastalady.
— Qarmet-ten qańyltyr metall kelgennen keıin, eń aldymen ony arnaıy bilikterden ótkizemiz. Osylaısha shanaqtyń tóbesi men búıir bólikterine qajetti qattylyq qabyrǵalary qalyptasady. Odan keıin metall shtamptaý úderisine jiberiledi. Munda press dóńgelekter ornalasatyn arka tárizdi bólikterdi jáne basqa da qajetti elementterdi qalyptaıdy. Osylaısha qańyltyr metall birneshe kezeńnen ótip, daıyn avtobýstyń quramdas bóligine aınalady, — dedi Aleksandr Mızgýlın.
Mamannyń sózinshe, Qarmet bolatyn paıdalaný — óndiristegi otandyq materıaldardyń úlesin arttyrýǵa baǵyttalǵan aýqymdy jumystyń bir bóligi. Bul rette metall barlyq qajetti synaqtan ótkizilip, mashına jasaý ónimderine qoıylatyn talaptarǵa sáıkestigi tekserilgen.
— Úlgiler barlyq qajetti testileý men synaqtan ótti. Sondyqtan materıal óziniń tehnıkalyq sıpattamalary boıynsha bizdiń óndiristiń talaptaryna tolyq sáıkes keledi. Biz úshin otandyq ónimdi kólik quraldaryn óndirýde tolyqqandy paıdalaný múmkindigi óte mańyzdy, — dep atap ótti QazTehna óndiris jónindegi dırektory.
Kásiporynnyń jeke shtamptaý óndirisin iske qosýy óndiristi jergiliktendirýdi keńeıtýdegi mańyzdy qadamdardyń birine aınaldy. Buǵan deıin shanaqqa qajetti bólshekterdiń edáýir bóligi kásiporynǵa daıyn kúıinde jetkiziletin. Endi shanaqtyń negizgi metall elementteri Saran qalasyndaǵy zaýyttyń ózinde otandyq shıkizattan óndiriledi.
Bul ózgeris jergilikti qamtý úlesin arttyrýmen qatar, óndiristiń ózge de baǵyttaryna oń áserin tıgizedi. Atap aıtqanda, sheteldik jetkizýshilerge táýeldilik azaıyp, ımporttyq quramdas bólshekterdiń kólemi qysqarady. Sonymen birge logıstıkalyq shyǵyndardy ońtaılandyrýǵa múmkindik beredi.
— Jergiliktendirýdiń basty artyqshylyqtarynyń biri — ónimimizdiń básekege qabilettiligin arttyrý. Avtobýs óndirisinde otandyq materıaldardy neǵurlym kóp paıdalanǵan saıyn, ónimniń ózindik qunyn ońtaılandyrý múmkindigi de arta túsedi. Qarmet metalynyń taǵy bir artyqshylyǵy — logıstıkalyq turǵydan jaqyn ornalasýynda. Jetkizýshi bizge jaqyn bolǵandyqtan, tasymaldaý shyǵyndaryn da azaıta alamyz, — dedi Aleksandr Mızgýlın.
Búginde QazTehna otandyq komponentterdi paıdalanyp shyǵarǵan avtobýstar Qazaqstannyń túrli qalalarynda jolaýshylarǵa qyzmet kórsetip júr. Kásiporynda Yutong markaly qalalyq, týrıstik jáne mektep avtobýstary shyǵarylady. Sonymen qatar óndiristiń jergilikti qamtý deńgeıin arttyrý maqsatynda Qazaqstannyń ózinde daıyndalatyn bólshekterdiń tizimi de birtindep keńeıip keledi.
Qarmet pen QazTehna arasyndaǵy óndiristik kooperatsııa metallýrgııa óniminiń keıingi óndiristik úderisterge qalaı engiziletinin kórsetedi. Bolat óndirýden bastap daıyn mashına jasaý ónimine deıingi birtutas óndiristik tizbek qalyptasyp keledi. Bul jaǵdaıda Temirtaýda óndirilgen metall Saran qalasynda jasalǵan avtobýstardyń quramdas bólshegine aınalyp, keıin Qazaqstan qalalarynyń joldaryna shyǵady.
Mashına jasaý salasyna arnalǵan metall ónimderin jetkizý — Qarmet-tiń qazaqstandyq kásiporyndarmen óndiristik kooperatsııasynyń negizgi baǵyttarynyń biri. Bul baǵytty damytý metallýrgııalyq kombınatty jańǵyrtý baǵdarlamasymen de sabaqtas. Baǵdarlama qurylys, mashına jasaý jáne avtomobıl ónerkásibine arnalǵan ónim túrlerin shyǵarýdy keńeıtýdi kózdeıdi.
