Qarmet bolat óndirisin 13%-ǵa deıin ulǵaıtty
ASTANA. KAZINFORM — Premer-mınıstr Temirtaý qalasyndaǵy Qarmet metallýrgııalyq kombınatynda boldy. Bıylǵy bes aıda kásiporyn qatty bolat óndirisin 13%-ǵa — 1,5 mln tonnaǵa deıin ulǵaıtty, dep habarlaıdy Úkimettiń baspasóz qyzmeti.
Premer-mınıstrge qýattylyǵy jylyna 4 mln tonnaǵa deıin suıyq bolat konverter tsehynyń alańynda Prezıdenttiń tapsyrmasyna sáıkes óndiristik qýattardy tabıǵı gazǵa qosý boıynsha júrgizilip jatqan jumys týraly baıandaldy. Ótken jyly № 1 jáne № 2 konverterlerge kúrdeli jóndeý júrgizilip, korpýstar tolyq aýystyryldy, anaǵurlym zamanaýı ári ornyqty konstrýktsııalar ornatyldy. Bul bolat balqytý kólemin ulǵaıtýǵa jáne tsehtyń óndiristik tıimdiligin arttyrýǵa múmkindik berdi.
Munda Oljas Bektenov № 8 jáne № 9 koks batareıalarynyń qurylysymen tanysty. Qýattylyǵy jylyna 1,5 mln qurǵaq koks bolatyn ınvestıtsııalyq joba Premer-mınıstrdiń 2024 jylǵy 5 qarashada Qytaı Halyq Respýblıkasyna jumys sapary kezinde qol jetkizilgen ýaǵdalastyqtar sheńberinde qytaılyq ACRE Coking & Refractory Engineering Consulting Co., Ltd kompanııasymen birlesip júzege asyrylýda. 2027 jylǵa josparlanǵan óndiristiń negizgi parametrleri tanystyryldy.
Qarmet basshylyǵy jańa quıý-prokat keshenin salý jobasyn júzege asyrý týraly baıandady. Keshendi iske qosý avtomobıl, hımııa, munaı, qurylys jáne basqa da salalar úshin bolattyń premıým markalaryn óndirýdi ıgerýge múmkindik beredi. Joba qazaqstandyq bolatty ótkizý naryqtarynyń geografııasyn keńeıtedi, energııa shyǵynyn tómendetedi jáne óndiris kezinde qorshaǵan ortaǵa áserin azaıtady.
Sondaı-aq zaýyttyń aınalasyndaǵy shaǵyn jáne orta bıznestiń ónerkásiptik beldeýiniń jobasy tanystyryldy. ShOB qaptamalar men súzgilerden bastap jaryq tehnıkasy men bolattan jasalǵan buıymdarǵa deıin qosylǵan quny joǵary ónimder shyǵarady. Alǵashqy ofteık-kelisimsharttar jasaldy, kásipkerlerge daıyn óndiristik alańdar jáne jylyna $87 mln somasyna ónimdi kepildi ótkizý usynyldy.
Premer-mınıstr Temirtaý qalasyndaǵy jylý jelilerin rekonstrýktsııalaý ýchaskesin qarap shyqty. Joba kommýnaldyq ınfraqurylymdy jańǵyrtý sheńberinde júzege asyrylýda jáne dıametri 820 mm 8 shaqyrymnan astam qubyrdy aýystyrýdy kózdeıdi. Jańa qubyrlar zamanaýı jylý oqshaýlaǵysh materıaldarmen jáne qorǵanys qaptamasymen jabdyqtalǵan, bul jylý shyǵynyn aıtarlyqtaı azaıtýǵa jáne qalanyń Shyǵys jáne Ortalyq aýdandaryn senimdi jylý kózimen qamtamasyz etýge múmkindik beredi.
Oljas Bektenov jylytý maýsymyna daıyndyq erekshe baqylaýda ekenin atap ótti. «Qyzyl aımaqqa» engizilgen Temirtaý sııaqty qalalarǵa nazar aýdarylady. Oblys ákimdigine kún sýytqanǵa deıin jylýmen jabdyqtaý jobalaryn júzege asyrýdy aıaqtaý tapsyryldy. Energetıka mınıstrligi — barynsha járdem kórsetýi kerek, Qarjy mınıstrligi Ulttyq ekonomıka mınıstrligimen birlesip áleýmettik mańyzy bar ınfraqurylymdyq jobalardy, onyń ishinde sýmen jabdyqtaý jelilerin salý jónindegi jobalardy qarjylandyrý máselesin basty nazarda ustaýy tıis.
Nura aýdanynda ornalasqan «Ramadan sút fermasy» JShS-ne barǵan Oljas Bektenov óńirdiń agroónerkásip kesheniniń damýymen tanysty. Jańa kásiporyn eýropalyq standarttar boıynsha jaraqtandyrylyp, Qaraǵandy oblysyndaǵy eń iri kásiporyndardyń birine aınalady. 1,1 myń bas golshteın-frız malyn ustaýǵa arnalǵan jeke jemshóp óndirisi qarastyrylǵan, onyń ishinde 880 sıyr kún saıyn saýylady. Ferma 2026 jyldyń birinshi jartyjyldyǵynda tolyq qýatyna shyǵady jáne jylyna 9,5 myń tonnadan astam sút óndirýdi qamtamasyz etedi. Ónimder Qaraǵandy oblysy men Astana qalasynyń sút óńdeý kásiporyndaryna jetkiziletin bolady. Joba aıasynda 70 jańa jumys ornyn ashý josparlanýda. Premer-mınıstr memlekettiń aýqymdy qoldaýynyń arqasynda fermerler óz kezeginde turaqty nátıjelerdi qamtamasyz etýi, óndiristi jańǵyrtýy jáne aýyldaǵy ómirdi jaqsartýǵa qatysýy tıis ekenin atap ótti.
Oblys ákimdigine Aýyl sharýashylyǵy mınıstrligimen birlesip egin jınaý jumystaryna sapaly daıyndalý jáne qajetti azyq-túlik qoryn qalyptastyrý tapsyryldy. Aýyl sharýashylyǵy mınıstrliginiń aldyna múddeli memlekettik organdarmen birlesip, shegirtkelerdiń taralýyna jol bermeý jáne egis alqaptaryn qorǵaý sharalaryn qamtamasyz etý mindetin qoıdy.
— Memleket basshysy bizge ónerkásipti damytýdy arttyrý mindetin qoıyp otyr. Bıylǵy 5 aıdyń qorytyndysy boıynsha Qazaqstannyń JІÓ 6%-ǵa ósti. Bul rette biz ekonomıka qurylymyn ártaraptandyrý jónindegi jumysty ári qaraı kúsheıtýge tıispiz. Qaraǵandy oblysy elimizdiń negizgi ónerkásiptik óńiri sanalady. Búgingi tańda biz qosylǵan quny joǵary ónim shyǵarýdy ulǵaıtý boıynsha nátıjelerdi kórip otyrmyz. Barlyq kásiporyndar osyǵan umtylýy kerek. Importty almastyrý — bizdiń basty mindetimiz. Úkimet osyndaı óndiristerdiń damýyn tolyq qoldaıtyn bolady. Óz kezeginde bıznes zamanaýı tehnologııalardy engizý, shyǵarylatyn ónim sapasyn arttyrý jáne eksporttyq áleýetti jetildirý sekildi qarsy mindettemelerdi oryndaýy tıis, — dep atap ótti Oljas Bektenov.
Ónerkásip jáne qurylys mınıstrligine múddeli organdarmen birlesip kásiporyndardyń qýattaryn turaqty júkteýdi jáne sabaqtas óndiristerdiń búkil tizbegin damytýdy qamtamasyz etý tapsyryldy.
Buǵan deıin Bektenov Qaraǵandy oblysyndaǵy ónerkásip pen AÓK-ti damytý barysyn teksergenin jazdyq.