Qarmet basshysy «Naýryz jumysker» ıpotekalyq baǵdarlamasyn Qaraǵandy oblysynan bastaýdy surady
ASTANA. KAZINFORM – Qarmet akıtsonerlik qoǵamynyń ornyqty damý jónindegi basqarýshy dırektory Erbol Ismaılov Senatta ótip jatqan parlamenttik tyńdaýda jumysker» ıpotekalyq baǵdarlamasyn Qaraǵandy oblysynan bastaýdy surady.
Onyń aıtýynsha Qarmet kásipornynda 34 myń jumysshy bar.
- Eńbek qaýipsizdiginiń joǵary standarttary da kásiporyndar úshin synaq bolyp tur. Óndiris kásiporyndaryndaǵy kóptegen qaıǵyly oqıǵalar men qurbandardan sabaq alýymyz kerek. Taý-ken kásiporyndarynda nege ereýilder bolyp, apattar týyndap jatady? Biz bul máselege ǵylymı-ádistemelik turǵydan kelip jatyrmyz. Jyl aıaǵyna deıin bizdegi shahtalardyń bári jerasty pozıtsııalaý júıesin engizemiz. Sonyń arqasynda jer astynda júrgen 14 myń kenshiniń árqaısysynyń qımylyn jerden baqylap otyramyz, - dedi ol.
Kásiporyn basshysy kolledjderdiń kásiptik-tehnıkalyq bilim berý baǵdarlamasyn tehnologııalyq progrespen úılestirip júrgizýdiń mańyzyna toqtaldy.
- Tehnıkalyq mamandyqtarǵa jastardyń barǵysy kelmeıtini eshkimge qupııa emes shyǵar. Byltyr jylý energetıkasy mamandyǵy boıynsha usynylǵan grantqa búkil respýblıka boıynsha bir de bir talapker túspegen. Óndiristi tsıfrlandyrý men avtomattandyrý trendteri jańa mashyqtar men múlde ózgeshe quzyretterdi talap etedi. Sondyqtan mamandardy daıarlaý men qaıta daıarlaý júıesi kolledjder satysynda reformalanýy kerek. Áıtpese básekege tótep bere almaıtyn, erteń jumyssyz qalatyn mamandar daıarlaı beremiz, - dedi Erbol Ismaılov.
Sondaı-aq, ol «Otbasy bank» basshysyna ótinish aıtty.
- Lázzat Erkinqyzy, «Naýryz jumysker» ıpotekalyq baǵdarlamasyn birinshi kezekte Qaraǵandy oblysynda iske asyryp bastaýyńyzdy suraımyn. Óıtkeni bizdegi óńir jumysshylarynyń bul baǵdarlamaǵa degen úlken suranysy bar jastar Men kún saıyn shahterlermen kezdesemin Osy múmkindik paıdalanyp búkil senatorlarǵa 34 myń adamy bar ujymnyń sálemin jetkizgim keledi, - dedi Qarmet dırektory.
Eske salsaq, byltyr jazda Qarmet metallýrgııa zaýytynda merdiger uıymnyń eki jumysshysy qaza tapqan edi.