«Qarmet» AQ-daǵy jańa ınvestor mindetterin oryndap jatyr ma
ASTANA. KAZINFORM – Ónerkásip jáne qurylys mınıstrligi «Qarmet» AQ-daǵy jańa ınvestor ózine alǵan barlyq mindettemeni qanshalyq oryndap jatqanyna túsinik berdi.
«Byltyrdyń sońynda Qaraǵandy metallýrgııa zaýytynda basshylyq aýysqany belgili. Jańa ınvestor („Qarmet“ AQ) jyl basynda ózine belgili bir mindettemeler aldy, sonyń ishinde kombınatty jańǵyrtý ári damytý, ónerkásiptik qaýipsizdik pen eńbekti qorǵaýdy qamtamasyz etý jáne ekologııalyq turaqtandyrý máseleleri eskerilgen. Qazirgi kezde jańa ınvestor búkil metallýrgııalyq kombınatty ońaltý jáne jańǵyrtý boıynsha aýqymdy jumysty atqaryp jatyr. Kompanııa basshylyǵy 2024-2028 jyldarǵa arnalǵan strategııalyq baǵdarlamasyn ázirledi. Strategııalyq baǵdarlamanyń negizgi maqsattaryna eńbek qaýipsizdigin qamtamasyz etý jáne óndiristik dıvızıondardyń jumysyn turaqtandyrý, qýattylyqty arttyrý, ónerkásiptik qaýipsizdikti qamtamasyz etý, bolat pen kómir óndirisiniń kólemin tıisinshe aldaǵy bes jylda 5 mln jáne 9 mln tonnaǵa deıin ulǵaıtý, sondaı-aq ónim sapasyn jaqsartý kirdi», — delingen mınıstrliktiń Kazinform agenttigine bergen jaýabynda.
Vedomstvonyń aqparatyna qaraǵanda, eńbek qaýipsizdigi «Qarmet» AQ úshin basym baǵyt bolyp qala beredi. 2024 jyly qaýipti óndiristik obektilerdi zertteý, trenıngter men oqý-jattyǵýlaryn ótkizý boıynsha is-sharalar josparlanyp, 15 000-nan astam qyzmetker daıarlyqtan ótti.
«Ekologııalyq turaqtandyrý salasyndaǵy mańyzdy qadam — „Qarmet“ AQ-nyń óndiristik protsesterde tabıǵı gazdy paıdalanýǵa kóshýi, bul óz kezeginde kómirqyshqyl gazy men basqa da lastaýshy zattardyń shyǵaryndylaryn edáýir qysqartýǵa, sondaı-aq JEO-2 jáne JEO-PVS-da jańa qazandyqtardy aýystyrý men salýǵa, koks-hımııa óndirisinde Koks batareıalaryn jóndeýge jáne salýǵa múmkindik beredi. Jalpy, „Qarmet“ AQ mindettemeleriniń oryndalýy erekshe baqylaýda tur», — dep atalyp ótken Ónerkásip jáne qurylys mınıstrligi málimetinde.
Esterińizge sala keteıik, byltyr 28 qazan kúni saǵat 02:33–te «ArselorMıttal Temirtaý» kompanııasyna tıesili Qaraǵandy oblysyndaǵy Kostenko atyndaǵy shahtada jarylys boldy.
Jeltoqsan aıynda «ArselorMıttal Temirtaý» resmı túrde QARMET bolyp ózgerdi.
Sol kezde QR Ónerkásip jáne qurylys mınıstri Qanat Sharlapaev jańa ınvestor qandaı mindettemelerdi óz jaýapkershiligine alǵanyn aıtty.
Sondaı-aq, Memleket basshysy bıyl Qazaqstan halqyna Joldaýynda «Qarmet» metallýrgııa kombınatyndaǵy ahýal edáýir turaqtalǵanyn aıtty.
