Qarmet TMD-da kóshbasshy kásiporyndardyń biri bolmaq: Prezıdent Lavrentevti qabyldady
ASTANA. KAZINFORM — Qasym-Jomart Toqaevqa «Qarmet» kásipornynyń qazirgi jaı-kúıi, qalypty jumysqa kóshý sharalary, sondaı-aq óndiris kólemin ulǵaıtý, eńbek qaýipsizdiginiń deńgeıin kóterý jospary týraly baıandaldy, dep habarlaıdy Aqorda.
Kezdesý barysynda Memleket basshysy kásiporyn qyzmetkerleriniń qaýipsizdigin qamtamasyz etý, apattyq jaǵdaılardy boldyrmaý maqsatynda qural-jabdyqtar men materıaldyq-tehnıkalyq bazany barynsha jańǵyrtý jumystaryn júrgizý asa mańyzdy ekenin atap ótti.
Qazaqstan Prezıdentine «Qarmet» kompanııasynyń basshylyǵy metallýrgter jáne kómir óndirýshiler kásipodaǵymen kezdesý ótkizgeni týraly baıandaldy.
Onda eńbek sharty, ujym úshin mańyzdy sheshimder qabyldaýda ózara yqpaldastyqty odan ári jalǵastyrý máseleleri talqylanǵan.
Kezdesý qorytyndysy boıynsha kompanııa men qyzmetkerler arasynda bolashaq ujymdyq shartty birlesip ázirleý týraly kelisimge qol qoıylǵan.
Andreı Lavrentevtiń aıtýynsha, «Qarmet» kompanııasy óndiris kólemin arttyrý, Ortalyq Azııa men TMD-da metallýrgııa salasy boıynsha kóshbasshy kásiporyndardyń biri retindegi mártebesin 2028 jylǵa qaraı qaıtarý jóninde strategııalyq maqsat qoıyp otyr.
Kózdelgen maqsattardy iske asyrý úshin jylyna bolat óndirisin 64 paıyzǵa (5 mıllıon tonnaǵa deıin), temir keni kontsentratyn 88 paıyzǵa (5 mıllıon tonnaǵa deıin) jáne kómir óndirýdi 47 paıyzǵa (9 mıllıon tonnaǵa deıin) ulǵaıtý josparlanǵan.
Sonymen qatar Qasym-Jomart Toqaev óńirdegi ekologııa máselesine erekshe nazar aýdaryp, jabdyqtardy gazǵa kóshirý arqyly Temirtaý qalasyndaǵy ekologııalyq ahýaldy saýyqtyrý úshin túbegeıli sharalar qabyldaý qajet ekenin atap ótti.
Budan bólek, Memleket basshysyna Allur mashına jasaý kásiporny jumysynyń nátıjesi men damý jospary týraly málimet berildi.
2023 jyly zaýyt 90 myńnan astam tehnıka shyǵardy. Bul — otandyq mashına jasaý salasyndaǵy rekordtyq kórsetkish. Bıyl naýryz aıynda Chevrolet Onix avtomobılderin usaq bólshekterden qurastyrý óndirisi iske qosylady.
Škoda avtomobılderi serııasyn shyǵarýǵa arnalǵan jabdyqtar retke keltirilip jatyr. Qostanaı qalasynyń ındýstrııalyq aımaǵynda qýaty jylyna 70 myń mashına óndirýge jetetin Kia Qazaqstan zamanaýı zaýyty salynýda.
Kezdesý sońynda Memleket basshysy eńbek qaýipsizdigin qamtamasyz etý úshin keshendi sharalar qabyldaý mańyzdy ekenin atap ótip, ınvestıtsııalyq jobalardyń ýaqytyly júzege asyrylýyn jalǵastyrýdy, sonyń ishinde ekologııany jaqsartýǵa baǵyttalǵan jumystarǵa basa mán berýdi tapsyrdy.
