QargalyFest: Aqtóbede ishki týrızmge salynǵan ınvestıtsııa eki ese artty

AQTÓBE. QazAqparat - Aqtóbede ishki týrızmge quıylǵan ınvestıtsııa eki ese artyp, qazirgi kezde jańa nysandar salynyp jatyr. Al jazǵy maýsymdaǵy festıvaldarǵa tek óńir turǵyndary emes, reseılikter de qatysty, dep habarlaıdy QazAqparat tilshisi.

Aqtóbe oblysyndaǵy Qarǵaly sý qoımasy aýmaǵynda «QargalyFest» mýzykalyq festıvali jáne «Qazaqman» trıatlony jarysy ótti.

Festıvalge qala turǵyndary, qonaqtar, óńirlik jáne estrada juldyzdary qatysty.

Shara barysynda óńir basshysy Ońdasyn Orazalın festıval jumysymen tanysyp, týrızmdi damytý baǵyttalǵan jobaǵa sáttilik tiledi.

Festıval aıasynda ótken «QAZAQMAN» trıatlonnan jarysta Qazaqstannyń túrli qalalarynan 140-tan astam myqty sportshy, onyń ishinde kásibı trıatletter de qatysty.

Qatysýshylar 2,5 km júzý, 50 km velojarys jáne 13 km júgirýden komandalyq jáne jeke synaqtan ótti.

Іshki týrızimdi damytýǵa jáne oblys turǵyndaryna merekelik kóńil-kúı syılaý maqsatynda ótken festıval aıasynda qolóner sheberleriniń kórme-jármeńkeleri, sporttyq sheberlik saǵattary, túrli jármeńkeler uıymdastyryldy.

Kesh sońynda kontserttik baǵdarlamaǵa Qanay, «Orda» toby, Kali, Maqlao, Ka-Re jáne Abdr sııaqty juldyzdar qatysty.

«Sheksiz aspan», «QargalyFest» festıvalderinde jınalǵan qarjy naýqas Jansel Saǵyndyqovanyń emi úshin aýdaryldy. Ol qazir emin alýǵa ketti. Bári ashyq bolýy úshin trıatlonǵa tirkelý kezinde qarjy birden naýqas qyzdyń esepshotyna tústi. Shamamen 700 mvńǵa jýyq qarjy aýdaryldy. «Sheksiz aspan» festıvalinde 140 myńǵa jýyq qarjy tústi»,- dedi oblystyq kásipkerlik basqarmasynyń basshysy Nurhan Tileýmuratov.

Onyń aıtýynsha, festıval uıymdastyrylǵan Qarǵaly sý qoımasy elimizdegi eń úzdik 50 týrıstik oryn tizimine kirdi. Bul tizim jańaryp, óńir birneshe jańa baǵytty usyndy.

«Byltyr óńirge 149 myń adam keldi. Onyń 12 myńnan astamy jaqyn, alys shetel azamattary. Reseı, Qytaıdan bar. Byltyr týrızmdi damytýǵa 17 mlrd teńge ınvestıtsııa salyndy. 2020 jylmen salystyrǵanda eki ese artqan. Jyl saıyn qonaq úı ashylady. Demek qyzmet kórsetý sapasy artady», - dedi Nurhan Tileýmuratov.

Aıta keteıik, Dımash Qudaıbergenniń qyrkúıektegi kontsertine keletin jankúıerler Aqtóbege soǵýy múmkin.

Qazirgi kezde birneshe týrmarshrýt ázir tur. Biri - Dımashtyń úıi bolsa, ekinshisi - Aqtolaǵaı.