Pysyqaı kásipkerler bankterdi qalaı aldaıdy

ASTANA. QazAqparat - Astanalyq prokýrorlar birqatar kásiporyn basshylarynyń qıturqy áreketterin áshkereledi. Pysyqaı kásipkerler bank aldyndaǵy bereshegin ótemeý úshin ózderine mıllırdap jalaqy jazyp kelgen. Ondaı shemalardyń jalpy somasy 1,3 mlrd teńgeni qurady, dep habarlaıdy QazAqparat tilshisi.

Prokýrorlardyń aıtýynsha, kásiporyn basshylary aqshasyn saqtap qalý úshin óz attaryna joǵary jalaqy jazyp otyrǵan. Keıin úlken soma bereshek bolyp qalǵan óz kompanııalarynyń ústinen ózderi aryz túsirgen.

«Máselen, bir jaýapkershiligi shekteýli seriktestiginiń quryltaıshysy bank aldyndaǵy 381 mln teńgeniń qaryzyn tólemeý úshin bir jyldyń ishinde ózine 1 mıllıard teńgeden astam jalyqy jazǵan. Osydan keıin sotqa aryzdanyp, jalaqyny óndirip berýdi talap etti. Odan ári aryzdanýshy retinde ózi basqaryp otyrǵan kásiporynmen mámilege kelip, úkim qaǵazyn shyǵaryp alǵan. Sóıtip, jalaqynyń qaryzyn óz mekemesiniń atyna shyǵysqa jazǵan. Al zań boıynsha aldymen jalaqynyń qaryzy óndiriledi. Prokýrorlardyń bastamasymen sottyń sheshimi joıyldy», - dep atap ótti elorda prokýratýrasynan.

Dál osyndaı faktiler taǵy úsh kásiporynda anyqtaldy. Ekeýine qatysty Qylmystyq kodekstiń 416-baby, 1-bólimi boıynsha qylmystyq is qozǵaldy. Barlyq kásiporyndardyń sot úkimderin joqqa shyǵarý sharalary qolǵa alyndy.