Pyshaqpen qorqytyp qymbat kólikti qoldy qylǵandar ustaldy
ASTANA. 16 qarasha. QazAqparat /Marlan Jıembaı/ - Pyshaqpen qorqytyp qymbat kólikti qoldy qylǵandar ustaldy. Bul týraly búgin aptalyq brıfıngte QR Іshki ister mınıstrliginiń resmı ókili Nurdildá Oraz málim etti.
«Almaty qalasynyń polıtseıleri ústimizdegi jylǵy qarasha aıynda jergilikti turǵynǵa qaraqshylyq shabýyl jasap, avtokóligin ıelenip ketý qylmysyn ashty. 19 jastaǵy jábirlenýshi dosynyń ótinishi boıynsha «Toıota Land Krýzer» avtomashınasyn satyp bermekshi bolyp, ǵalamtorǵa jáne gazetke habarlandyrý bergeni anyqtaldy», - dedi ol.
Resmı ókildiń atap ótýinshe, birneshe kún ótkennen keıin beıtanys adam telefon soǵyp, mashınany kórý úshin kezdesetinin aıtqan. Belgilengen jerge kelgen kezde tórt jigit kelip, avtomashınany qaraımyz degen syltaýmen salonǵa otyrǵan. Osydan keıin jábirlenýshini pyshaqpen qorqytyp, quny 4,5 mıllıon teńge turatyn avtomashınany ıelenip ketken.
»Jedel-izdestirý is-sharalary barysynda qylmysty paıdaqorlyq maqsatta jasaǵan Almaty oblysynyń 20 jastaǵy jáne Shyǵys Qazaqstan oblysynyń 27 jastaǵy turǵyndary ustaldy. Qylmys quraly - pyshaq tárkilendi. Ustalǵandar ýaqytsha oqshaýlaý ornyna qamaldy. Qazirgi ýaqytta polıtsııa qyzmetkerleri avtomashınany izdestirý jáne qylmysqa qatysy bar basqa adamdardy tutqyndaý boıynsha sharalar qabyldaýda», - dedi N.Oraz.
