PWL týrnıri: Azamat Dáýletbekov qarsylasynan basym tústi
ASTANA. KAZINFORM — Búgin Alataý eteginde álemniń eń áıgili balýandarynyń basyn qosqan PWL týrnırinde erkin kúresten álem chempıonatynyń 2 dúrkin qola júldegeri, 3 dúrkin Azııa chempıony Azamat Dáýletbekov qarsylasynan basym tústi.
PWL týrnırde ol Olımpıadanyń kúmis júldegeri, Belarýs eliniń namysyn qorǵap júrgen daǵystandyq Hadımagomedov Magomedhabıbpen beldesip, 4:0 esebimen jeńiske jetti.
Otandasymyz osymen úshinshi ret PWL týrnırine kúresip otyr. Buǵan deıin atalǵan týrnırge eki ret qatysyp, alǵashqysynda qarsylasyna jol berse, ekinshi ret jeńiske jetken bolatyn. Mine, úshinshi ret taǵy da jarysty jeńispen aıaqtady.
Sonymen qatar atalǵan synda áıelder kúresinen Jámıla Baqbergenova synǵa túsken bolatyn. Ókinishke qaraı, otandasymyz qyrǵyzstandyq áıgili balýan Aıperi Medetqyzyna 5:1 esebimen jol berdi.
Endi sanaýly sátterden keıin PWL týrnıriniń basty aıqasy dep sanalǵan Rızabek Aıtmuqan men amerıkanyń áıgili balýany, Olımpıada chempıony Kaıl Sneıder arasyndaǵy beldesýler ótedi.
Bul jekpe-jek jankúıerler úshin erekshe qyzyqty bolary anyq. Sebebi Rızabek — jas bolsa da, álemdik arenada ózin dáleldep úlgergen balýan.
Ol 2023 jyly Belgradta ótken álem chempıonatynda altyn medal jeńip alyp, qazaq kúresiniń tarıhyna esimin altyn árippen jazdy. Óziniń fızıkalyq qýaty men tehnıkalyq sheberliginiń arqasynda Aıtmuhan aldaǵy beldesýde laıyqty qarsylas bolatyny sózsiz.
Osyǵan deıin Rızabek Aıtmuqan áıgili balýan Kaıl Snaıdermen beldesetini týraly jazǵan bolatynbyz.