Pýtın jer ústi kóliginen bas tartyp, biryńǵaı tikushaqqa kóshpek
ASTANA. 17 mamyr. QazAqparat - Máskeý Kremliniń aýmaǵynda prezıdenttiń ushý saparlaryna arnalǵan jańa tikushaq alańy ázirlendi, dep habarlady Ýtro.rý.
Reseılik kóshbasshylar qyzmettik temir tulpardy áýe kóligine aýystyrýǵa túbegeıli bekingenge uqsaıdy. Resmı habarlamalarǵa sensek, mundaı sheshim ótken jyldyń kúzinde qabyldanǵan. Bul astanadaǵy kólik qozǵalysyn jeńildetýmen baılanysty bolyp otyr.
Rasymen, onsyz da keptelisi joǵary Máskeýdiń iri magıstraldarynda qozǵalysty birneshe saǵatqa shekteý buqaranyń mazasyn qashyrýda. Bul bılik ókilderiniń óz artyqshylyqtarymen kúresýge talpynǵan alǵashqy áreketteri emes. Buǵan deıin tóbesinde sırenalary bar kólikterdiń sanyn azaıtýǵa baǵyttalǵan shara qolǵa alynǵanymen, aıtarlyqtaı esh nátıje shyqpady. Esesine qarapaıym kólik ıeleriniń joldaǵy sheneýnikterdiń artyqshylyǵyna qarsylyǵy sezile bastady. Júrgizýshiler kóliktiń tóbesine kók tústi shelekter ornatyp, qarsylyq sharalaryn ótkizdi. Munymen shektelmeı, arnaıy sıgnaly bar kólik júrgizýshileri tarapynan jasalǵan zańbuzýshylyqtardy taspaǵa túsirip, rolıkterdi kópshiliktiń nazaryna usyna bastady. Bul Ǵalamtordy dúr silkindirip, keıde óz jemisin de berip jatty. Nátıjesinde rejısser Nıkıta Mıhalkov arnaıy sıgnaldan bas tartýǵa májbúr boldy, sondaı-aq vedomstvolyq kólikke jol bermegen kólik ıesiniń basyna qarý kezegen TJM-niń sol kezdegi basshysy Sergeı Shoıgýdyń júrgizýshisi jumysynan bosatyldy.
