Pýtın jankúıerlerdi fýtboldan álem chempıonatynyń bastalýymen quttyqtady
ASTANA. QazAqparat - Reseı Prezıdenti Vladımır Pýtın teńbil dop jankúıerlerin tórt jylda bir ret keletin fýtboldan álem chempıonatynyń resmı bastalýymen quttyqtady, dep habarlaıdy QazAqparat tilshisi.
Máskeýdiń «Lýjnıkı» alańynda Reseı men Saýd Arabııasy quramasy arasyndaǵy alǵashqy oıyn bastalar aldynda sóz sóılegen Reseı Prezıdenti Vladımır Pýtın stadıondaǵy, kógildir ekran men ınternet arqyly tartysty dodany tamashalamaq bolyp otyrǵan kórermendi ǵalamshardyń eń basty týrnıriniń bastalýymen quttyqtady.
«Osynaý aýqymdy sporttyq shara Reseıde alǵash ret ótip jatyr. Biz buǵan shynaıy qýanyshtymyz. Bizdiń elimizde fýtbol tek qana jappaı buqaralyq oıyn emes. Fýtboldy shyn máninde jaqsy kóredi jáne bir kórgennen-aq bastalǵan bul súıispenshilik 1897 jyly birinshi ret Reseıde ótken resmı matchta oryn aldy. Biz ózi jerimizde osynaý aýqymdy sharany ótkizýge barynsha tyńǵylyqty daıyndaldyq. Jankúıerler, sportshylar, mamandar fýtboldyń shamasha merekesine tolyqtaı shomylýy úshin barlyq jaǵdaı jasadyq», - dedi Vladımır Pýtın.
Reseı Prezıdentinen keıin FIFA prezıdenti Djannı Infantıno sóz sóılep, aǵylshyn, orys jáne arab tilderinde barlyq jankúıerdi quttyqtady. Osydan keıin Reseı men Saýd Arabııasynyń memlekettik ánurany oryndalyp, komandalar arasyndaǵy oıyn bastaldy.
Aıta keteıik, nebári 15 mınýttaı ýaqytqa sozylǵan ashylý saltanatyn Qazaqstan Prezıdenti Nursultan Nazarbaev jáne ózge de birneshe memlekettiń basshylary tamashalady. Álem chempıonatynyń ashylý saltanatynda tanymal ánshi Robbı Ýılıams pen reseılik Aıda Garıfýllına án oryndap, alǵashqy topty tebý mártebesi brazılııalyq dańqty fýtbolshy Ronaldoǵa buıyrdy.
Álemdik kil myqty komandalardyń kezdesýi 14 maýsym - 15 shilde aralyǵynda Reseıdiń 11 qalasynda ótedi, atap aıtqanda, Máskeý, Sankt-Peterbýrg, Qazan, Sochı, Volgograd, Ekaterınbýrg, Kalınıngrad, Nıjnıı Novgorod, Dondaǵy Rostov, Samara jáne Saransk. Chempıonatqa álemniń 32 úzdik ulttyq quramalary qatysady.
Esterińizge sala ketsek, Reseı óz tarıhynda tuńǵysh ret Álem chempıonatyn uıymdastyrý múmkindigine ıe boldy. Qazaqstandyqtar FIFA- 2018 oıyndarynyń ashylý saltanatynan bólek, chempıonattyń Reseı men Saýd Arabııasy arasyndaǵy (astana ýaqytymen 21.00) alǵashqy matchyn da «Qazaqstan» telearnasynan tikeleı kóre alady.
Álemdik doda aıasynda ótetin 60-tan astam matchty «Qazaqstan» men «Qazsport» arnalary túgeldeı tikeleı efırden kórsetetin bolady. Aıta keterligi, fýtboldan Álem chempıonatynyń 1/8 fınaly 30 maýsym kúni, al qazaqstandyqtar Astana kúnin toılap jatatyn 6 shilde kúni - shırek fınal bastalady. Jartylaı fınal 10-shy jáne 11-shi shilde kúnderi, fınal 15 shilde kúni bolady.
Foto: detonators.ru
