Pýtın Zelenskıımen kezdesýdi Máskeýde ótkizýdi usyndy

ASTANA. KAZINFORM — Vladımır Pýtın Qytaıǵa jasaǵan saparynyń qorytyndysy boıynsha ótken baspasóz konferentsııasynda Vladımır Zelenskıımen kezdesý múmkindigi týraly pikir bildirip, ondaı kezdesýdi eshqashan joqqa shyǵarmaǵanyn eske saldy, dep habarlaıdy Kazinform tilshisi TASS agenttigine silteme jasap.

Pýtınniń aıtýynsha, mundaı kelissózderdi ótkizýdi odan Donald Tramp suraǵan. Osyǵan baılanysty Reseı basshysy Zelenskııdi Máskeýge kelýge shaqyrdy.

— Eger Zelenskıı daıyn bolsa — Máskeýge kele bersin, ondaı kezdesý ótedi, — dedi Pýtın.

Sondaı-aq, Vladımır Pýtın Donald Tramppen múmkin bolatyn kezdesý týraly da pikir bildirdi:

— Kezdesýdiń ýaqyty belgisiz, daıyndyq júrgizilip jatqan joq, biraq shaqyrý ústelde jatyr, — dedi ol.

Eske salaıyq, Aq úı basshysy Pýtınmen Ankorıdjdegi kezdesýden keıin ótken birlesken baspasóz konferentsııasynda Máskeýge kelý týraly shaqyrýǵa jaýap retinde bul múmkin ekenin aıtqan bolatyn.

Buǵan deıin qaı elder Pýtın men Zelenskııdiń kezdesýin uıymdastyrýdy usynǵanyn jazǵan edik.