Pýtın Tramptyń Kýrsk oblysyndaǵy ýkraınalyq áskerı qyzmetkerler týraly úndeýine pikir bildirdi

ASTANA. KAZINFORM — Pýtın Kýrsk oblysyndaǵy ýkraın áskerı kúshterine janashyrlyq tanytý jónindegi Tramptyń úndeýimen tanysty, dep habarlaıdy TASS.

— Biz AQSh prezıdenti, myrza Tramptyń búgingi ýkraın armııasynyń áskerı qyzmetkerleriniń ómirin saqtap qalý jónindegi úndeýimen tanystyq. Olardyń keıbir bóligi Reseı áskeriniń qorshaýynda, bul – Ýkraına Qarýly Kúshteriniń Kýrsk oblysyna basyp kirý aımaǵy, — dedi Vladımır Pýtın Reseı Federatsııasy Qaýipsizdik keńesiniń múshelerimen ótken jıynda.

Onyń aıtýynsha, Ýkraına Qarýly Kúshteri Kýrsk oblysynda beıbit halyqqa qarsy qylmys jasaǵan, olardy RF Bas prokýratýrasy terrorızm retinde baǵalaıdy.

Reseı prezıdentiniń kómekshisi ıÝrıı Ýshakov jýrnalısterge bergen málimdemesinde, Vladımır Pýtın ýkraın áskerı qyzmetkerlerine ómiri men laıyqty qarym-qatynasqa kepildik beretinin, biraq bul tek Kıev óz sarbazdaryna qarý tastap, tutqynǵa berilý týraly buıryq bergen jaǵdaıda ǵana múmkin bolatynyn aıtty, dep habarlaıdy TASS.

Buǵan deıin Tramp Pýtınniń áskerı qımyldardy toqtatý týraly aıtqan sózderine pikir bildirgeni habarlanǵan edi.

13 naýryzda Vladımır Pýtın Tramptyń arnaıy ókili Stıv Ýıtkoffty qabyldady. Bul týraly Reseı prezıdentiniń baspasóz hatshysy Dmıtrıı Peskov málimdedi.

Sonymen qatar, AQSh prezıdentiniń Ýkraına jáne Reseı boıynsha arnaıy ókili Kıt Kellog Máskeýdiń talaby boıynsha soǵys toqtatý jónindegi kelissózderden shettetildi.