Pýtın Sochıdegi Olımpıadaǵa daıyndyqtyń qunyn atady
ASTANA. 4 qyrkúıek. QazAqparat - Sochıdegi Olımpıada oıyndaryna daıyndyq jumystaryna 214 mlrd. rýb. jumsaldy, onyń 100 mlrd. rýbli - memleket qarjysy, al 114 mlrd. rýbli - ınvestorlardyń qarjysy, dep málimdedi RF prezıdenti Vladımır Pýtın "Birinshi arna" men Associated Press agenttigine bergen suhbatynda.
Bul jaıynda RBK habarlady.
«Infraqurylymdarǵa odan da kóp aqsha jumsaldy», - dep atap ótti V.Pýtın. «Biz buǵan sanaly túrde bardyq. Reseı Federatsııasy negizinen soltústikte ornalasqan, onyń ońtústiginiń tek Olımpıada oıyndary ýaqytynda ǵana emes, odan keıin de adam qyzyqtyratyndaı tartymdy ári yńǵaıly bolýy úshin biz osyndaı qadamdarǵa bardyq», - dedi ol.
«Bul sharýalar, sonymen birge reseılik azamattarynyń demalýǵa Túrkııaǵa, Eýropaǵa, Italııaǵa jáne basqa da elderge barmaı, aqshalaryn osy jerde jumsasyn degen oımen jasalyp otyr. Bul aımaqtyń aýa raıy jaıly, RF azamattarynyń jyl boıy demalýyna múmkindik bar», - dep túsindirdi V.Pýtın.
