Pýtın «Sırıýs» mektebi týraly: Qazaqstanda daryndy balalar kóp
ASTANA. KAZINFORM – Reseı Prezıdenti Vladımır Pýtın Peterbýrg halyqaralyq ekonomıkalyq forýmynda talantty balalardy anyqtap, qoldaýǵa baǵyttalǵan «Sırıýs» bilim berý júıesine toqtalyp, Qazaqstanda daryndy balalardyń kóp ekenin aıtty.
Onyń sózinshe, Qazaqstan men Reseı arasynda bilim berý salasyndaǵy yntymaqtastyqqa qyzyǵýshylyq joǵary.
— Bilim berý salasyndaǵy jetistikterdi odan ári damytýǵa qyzyǵýshylyq zor. Bul Qazaqstandaǵy bilim berý júıesiniń damýyna da, Reseıdegi bilim salasynda qalyptasyp jatqan jańa úrdisterge de qatysty, — dedi Vladımır Pýtın Qazaqstan Prezıdenti teleradıokesheniniń bas dırektory Raýshan Qajybaeva qoıǵan suraqqa jaýap berý kezinde.
Reseı Prezıdenti Qazaqstanǵa memlekettik sapary barysynda Memleket basshysy Qasym-Jomart Toqaevpen birge «Sırıýs» júıesiniń iske qosylýyna qatysqanyn eske saldy.
— Esterińizde bolsa, biz Qazaqstan Prezıdentimen birge «Sırıýs» júıesiniń jumysyn bastadyq. Bul joba óziniń tıimdiligin dáleldep, talantty balalardy anyqtaý men qoldaýdyń nátıjeli tásilderin qalyptastyrdy. Árıne, Qazaqstanda talantty balalar kóp. Eń bastysy — olardyń qabiletin damytýǵa jaǵdaı jasaý. Bizdiń osy baǵyttaǵy yntymaqtastyǵymyz soǵan arnalmaq, — dedi Vladımır Pýtın.
Aıta keteıik, buǵan deıin Astanada Qazaqstan — Sırıýs halyqaralyq bilim berý ortalyǵy qurylysynyń bastalýyna arnalǵan kapsýla salý rásimi ótken bolatyn.
