Álem kóshbasshylarynan Qazaqstanǵa izgi tilek: Toqaevqa quttyqtaý jedelhattary keldi
ASTANA. KAZINFORM — Prezıdent Qasym-Jomart Toqaevtyń atyna shet memleketter basshylary men halyqaralyq uıymdar jetekshilerinen ulttyq mereke — Respýblıka kúnine baılanysty quttyqtaýlar kelip túsip jatyr, dep habarlaıdy Aqordanyń baspasóz qyzmeti.
Reseı Prezıdenti Vladımır Pýtın jedelhatta Qazaqstannyń ekonomıkalyq jáne áleýmettik salalarda qol jetkizgen tabystaryna toqtalyp, elimizdiń halyqaralyq qarym-qatynasta salmaqty ári syndarly ról atqaratynyn, sondaı-aq álemde abyroı-bedeli bıik ekenin atap ótken.
— Reseı men Qazaqstan arasyndaǵy baılanystar strategııalyq seriktestik pen odaqtastyq rýhynda jemisti ilgerilep keledi. Barlyq baǵyttaǵy ózara tıimdi yntymaqtastyǵymyzdy dostas halyqtarymyzdyń ıgiligi úshin, sondaı-aq Eýrazııa keńistigindegi qaýipsizdik pen turaqtylyqty nyǵaıtý jolynda dáıekti túrde tereńdete beremiz dep senemin, — dep jazdy Vladımır Pýtın.
Qytaı Halyq Respýblıkasynyń Tóraǵasy Sı Tszınpın Qazaqstanda aýqymdy saıası reformalar iske asyrylǵanyn atap ótip, qoǵamdyq turaqtylyqty qamtamasyz etý, ekonomıkalyq ósimniń ornyqtylyǵyn saqtaý, halyqtyń ál-aýqatyn kóterý, eldiń óńirlik jáne halyqaralyq pozıtsııasyn nyǵaıtý baǵytynda qarqyndy jumys júrgizilip jatqanyna nazar aýdarǵan.
— Qazaq-qytaı qarym-qatynasyn ilgeriletýge erekshe mán beremin. Ekijaqty yntymaqtastyqty odan ári tereńdetý maqsatynda birlese kúsh jumyldyrýǵa, sondaı-aq halyqtarymyzdyń ıgiligi úshin yqpaldastyq mazmunyn baıytýǵa ázirmin, — dedi Sı Tszınpın.
Buǵan deıin Memleket basshysynyń atyna quttyqtaý hatyn AQSh Prezıdenti Donald Tramp ta joldaǵan bolatyn.
— Memleketterimiz arasyndaǵy Keńeıtilgen strategııalyq seriktestikti joǵary baǵalaımyn jáne men prezıdenttik laýazymdy atqarǵan eki merzimde qalyptasqan berik baılanysty odan ári nyǵaıtamyz dep senemin. Osy qýanyshty sátti sizdermen bólisý — men úshin zor mártebe, — dep jazǵan Donald Tramp.
Ózbekstan Prezıdenti Shavkat Mırzıeev keıingi jyldary eki el basshylarynyń birlesken erik-jigeriniń arqasynda Qazaqstan men Ózbekstan arasynda ornaǵan strategııalyq seriktestikke jáne odaqtastyq qarym-qatynasqa kóńili tolatynyn jetkizgen. Bul tatý kórshilik pen tyǵyz dostyq qaǵıdattaryna negizdelgen baılanystarymyzdyń sony sıpatqa ıe bolǵanyn kórsetedi.
Qyrǵyzstan Prezıdenti Sadyr Japarov 1990 jyly 25 qazanda Memlekettik egemendik týraly deklaratsııanyń qabyldanýy Qazaqstannyń táýelsizdigine jol ashqanyn, sondaı-aq eldiń tarıhı muraǵa adaldyǵyn jáne halyqtyń derbes el bolashaǵynyń irgesin qalaý jóninde batyl sheshim qabyldaǵanyn pash etkenin atap ótken.
Tájikstan Prezıdenti Emomalı Rahmon Qazaqstanmen aradaǵy tarıhı dástúrdi, ózara qurmetti jáne senimdi arqaý etken dostyq qarym-qatynas pen yntymaqtastyqty joǵary baǵalaıtynyn jazǵan.
Túrikmenstan Prezıdenti Serdar Berdimuhamedov quttyqtaýynda Qazaqstan egemendik jyldarynda memlekettilikti nyǵaıtýda, halyqtyń ál-aýqatyn jaqsartýda jáne eldiń halyqaralyq arenadaǵy bedelin arttyrýda aıtarlyqtaı tabysqa jetkenine nazar aýdarǵan.
Buǵan deıin Prezıdent Qasym-Jomart Toqaev Memlekettik tý kóterý rásimine qatysqanyn jazdyq.
