Pýtın ShYU sammıtiniń alańynda birneshe prezıdentpen ekijaqty kezdesý ótkizdi
ASTANA. KAZINFORM – Astanadaǵy Shanhaı yntymaqtastyǵy uıymynyń sammıtine kelgen memleket basshylary birneshe ekijaqty kezdesý ótkizdi.
Sammıt qarsańynda Ázerbaıjan Respýblıkasynyń prezıdenti Ilham Álıev pen Reseı Federatsııasynyń prezıdenti Vladımır Pýtın kezdesti. Qos memlekettiń basshylary ózara saýda-ekonomıkalyq, mádenı-gýmanıtarlyq baılanystardyń aıaq alysy jaıynda pikir almasty. Atap aıtsaq, ınfraqurylym («Soltústik – Ońtústik» tasjoly) energetıka, ónerkásip salasyndaǵy qarym-qatynastyń basym baǵyttary talqylandy.
Ázerbaıjandaǵy Reseı mádenı kúnderiniń alǵashqy qorytyndysy da kelissózge tıek boldy. V. Pýtın Ázerbaıjan basshysyna elde orys tildi bilim oshaqtarynyń turaqty jumys istep turǵany úshin alǵys bildirdi. Al I. Álıev aradaǵy taýar aınalymy keıingi eki jylda eki óskenin, ózara saýdaǵa ulttyq valıýtalar qoldanylyp jatqanyn jaǵymdy úrdis retinde atap ótti.
Sondaı-aq, Reseı basshysy Mońǵolııa prezıdenti Ýhnaagıın Hýrelsýhpen, Pákistan Islam Respýblıkasynyń premer-mınıstri Shahbaz Sharıfpen kezdesý ótkizdi.
Mońǵolııa jáne Reseı basshylarynyń kezdesýinde Eýropa men Qytaı arasyndaǵy tranzıttik júk tasymalynyń áleýeti men problemalary, Ulan-Batyr qalalyq temirjolynyń ótkizý qabiletin ulǵaıtý, Reseıdiń qıyr shyǵysy men Qytaı arasyn Shyǵys Mońǵolııada salynatyn jańa temirjol arqyly jalǵaý, birlesken GES salý máseleleri sóz boldy.
Al Shahbaz Sharıf pen Vladımır Pýtın kezdesýinde Pákistan-Reseı qarym-qatynasy iskerlik, dostyq sıpatta damyp jatqany aıtylyp, ózara saýda aınalymyn ári qaraı da arttyrýdyń múmkindikteri talqylandy.
