Pýtın sheteldik aktsıonerlerdi Kaspıı qubyr konsortsıýmyn qalpyna keltirýge kómektesýge shaqyrdy

ASTANA. KAZINFORM – Reseı prezıdenti Vladımır Pýtın úkimetpen kezdesý barysynda Krasnodar ólkesindegi Kaspıı qubyr konsortsıýmynyń (KQK) munaı aıdaý stansasyna ushqyshsyz basqarylatyn ushaqpen jasalǵan shabýylǵa qatysty pikir bildirdi, dep habarlaıdy kremlin.ru.

- Bul - reseılik uıym emes, bul halyqaralyq uıym... Al munaı, meniń túsinýimshe, ónimdi bólý týraly kelisimderge sáıkes, shyn máninde, osy sheteldik aktsıonerlerge tıesili, osy KQK qubyry arqyly aıdalǵan munaı. Meniń túsinýimshe, bul kompanııalardyń ókilderi osy shabýyldyń saldarynan kelgen shyǵyndy baǵalaýǵa qatysyp, nysandy qalpyna keltirýdiń merzimi men múmkindikterin anyqtaýy kerek, - dedi Pýtın úkimet múshelerimen kezdesýinde.

Vladımır Pýtın jóndeý jumystaryn tezdetý úshin kompanııanyń sheteldik seriktesterine jabdyqtardy ózderi ákelýin usyndy. 

- Eger olar nysannyń jumysyn qalpyna keltirýge múddeli bolsa, onda barlyq sanktsııalarǵa qaramastan, qajetti jabdyqty jetkizýdi uıymdastyrsyn. Olar muny ózderi jasasyn. Siz seriktestermen baılanys ornattyńyz dep túsinemin. Reseı úkimeti tarapynan birdeńe kerek bolsa, kómek kórsetýdi suraımyn, - dedi ol RF úkimeti basshysynyń orynbasary Aleksandr Novakqa.

Amerıkalyq Chevron munaı-gaz kompanııasy KQK munaı aıdaý stantsııasyna qatysty jaǵdaıdy biledi jáne baqylaýdy jalǵastyryp jatyr.

- Bizdiń basymdyǵymyz árqashan personaldyń, aktıvterdiń qaýipsizdigin, sondaı-aq munaıdy senimdi jáne úzdiksiz tasymaldaýdy qamtamasyz etý bolyp qala beredi. KQK – qazaqstandyq munaıdy halyqaralyq naryqqa shyǵarýdyń negizgi eksporttyq baǵyty jáne kóptegen elder ózderiniń energetıkalyq qaýipsizdigin qamtamasyz etý úshin osy mańyzdy kólik arterııasyna súıenedi, - dep habarlady kompanııa TASS agenttigine. 

Eske sala ketsek, 17 aqpanda Kaspıı qubyr konsortsıýmynyń «Kropotkınskaıa» munaı aıdaý stansasyna ushqyshsyz ushatyn apparatpen shabýyl jasaldy.

QR Energetıka mınıtrligi Kaspıı qubyr konsortsıýmy arqyly munaı aıdaýda shekteý joq ekenin málimdedi. 

Keıinnen Reseı Tergeý komıteti Kaspıı qubyr konsortsıýmynyń azamattyq nysandaryna jasalǵan shabýyl faktisi boıynsha qylmystyq is qozǵady.