Pýtın, Rýhanı jáne Erdoǵan Astanadaǵy ýaǵdalastyqtar aıasynda Sochıde bas qosady

ASTANA. QazAqparat - Túrkııa, Reseı jáne Iran prezıdentteri Sochıde bas qosyp, Sırııada zorlyq-zombylyqty azaıtý boıynsha qadamdardy qarastyratyn bolady. Bul týraly Túrkııa basshysynyń baspasóz hatshysy Ibragım Kalyn málim etti, dep habarlaıdy Anadoly agenttigi.  

Kalynnyń aıtýynsha, 22 qarasha kúni ótetin úshjaqty kezdesýde Túrkııa, Reseı jáne Iran prezıdentteri Astanada qol jetkizilgen kelisimder aıasynda Sırııada zorlyq-zombylyqty azaıtý boıynsha qadamdardy qarastyratyn bolady. Sondaı-aq deeskalatsııa aımaqtaryndaǵy másele sóz bolady.

«Onymen qosa, memleket basshylary Sırııaǵa gýmanıtarlyq kómek jetkizý máselelerin, sondaı-aq kepilger elderdiń BUU Qaýipsizdik Keńesiniń № 2254 qararyna sáıkes Sırııadaǵy ahýaldy saıası retteý boıynsha jenevalyq protseske qosýy múmkin úlesterin talqylaıtyn bolady», - dep atap ótti Kalyn.