Pýtın: Reseı Úndistannyń ShYU-ǵa qosylý nıetin quptaıdy
ASTANA. 24 jeltoqsan. QazAqparat - Shanhaı yntymaqtastyq uıymy (ShYU) aımaqtyq qaýipsizdiktiń, Eýrazııalyq aımaqtaǵy turaqtylyq pen yntymaqtastyqtyń mańyzdy faktoryna aınaldy.
Bul týraly Nıý-Delıde RF prezıdenti Vladımır Pýtınniń Úndistanǵa resmı saparynyń qorytyndylary boıynsha qol qoıylǵan birlesken málimdemede aıtylǵan, dep habarlady ITAR-TASS.
Óz tarapynan «Reseı Úndistannyń ShYU-ǵa tolyqqandy múshe retinde qosylý nıetine óziniń qoldaýyn qýattady jáne basqa ShYU múshe-memleketterimen birlese otyryp, onyń osy uıymǵa kirýi úderisin jedeldetý jónindegi sharalar qabyldaýdy jaqtaıdy».
Qujatta atap ótilgendeı, «taraptar Azııa-Tynyq muhıt aımaǵynda aımaqtyq yntymaqtastyqtyń kópbeıindi formattary oıdaǵydaı jumys istep otyrǵanyn kórsetedi». Solardyń arasynda - Reseı, Úndistan jáne Qytaı arasyndaǵy syrtqy saıası ózara is-qımyl tetigi bar, ol jahandyq jáne aımaqtyq isterde bizdiń elderimizdiń ustanymyn nyǵaıtýǵa járdemdesedi, ózekti álemdik problemalarǵa ortalyq turǵydan kelýge múmkindik beredi.
