Pýtın: Reseı men Qazaqstan arasyndaǵy esep aıyrysýlardyń barlyǵy ulttyq valıýtalarǵa aýysty
ASTANA. KAZINFORM – Reseı men Qazaqstan is júzinde barlyq esep aıyrysýdy ulttyq valıýtada júrgizedi, bul ózara saýdany syrtqy áserden qorǵaýǵa kómektesedi. Bul týraly búgin Astanada Qazaqstan Prezıdenti Qasym-Jomart Toqaevpen bolǵan kelissózden keıingi brıfıngide Reseı Prezıdenti Vladımır Pýtın málim etti.
Reseı basshysynyń aıtýynsha, búgingi eki el arasyndaǵy ekijaqty qarym-qatynastyń joǵary deńgeıin rastady.
- Búgingi kelissózderimiz shynymen de nátıjeli boldy. Bul Reseı men Qazaqstan arasyndaǵy shynaıy dostyq jáne tatý kórshilik qarym-qatynastarǵa sáıkes keledi. Biz ekijaqty yntymaqtastyqtyń saıasat, ekonomıka, mádenıet jáne gýmanıtarlyq salalardaǵy negizgi máselelerin jan-jaqty talqyladyq, sondaı-aq halyqaralyq ózekti máselelerdi qozǵadyq, - dedi Vladımır Pýtın.
Vladımır Pýtınniń aıtýynsha, eki el arasyndaǵy taýar aınalymy byltyr 29 mlrd dollarǵa jýyqtaǵan jáne jaqyn arada bul kórsetkish 30 mlrd dollardan asýy múmkin.
- Syrtqy saýda qurylymy keńeıip, ártaraptandyrylyp keledi. Eki el arasyndaǵy barlyq esep aıyrysý ulttyq valıýtada júzege asyrylyp keledi. Osylaısha, ózara eksporttyq jáne ımporttyq operatsııalar syrtqy áserlerden jáne álemdik naryqtaǵy teris úrdisterden senimdi qorǵalǵan, - dedi Reseı Prezıdenti.
Budan buryn habarlanǵandaı, Qazaqstan men Reseı arasyndaǵy ózara taýar aınalymy jaqyn arada 30 mlrd dollardan asyp túsedi.
