Pýtın: Reseı Qazaqstandaǵy amýr jolbarystarynyń sanyn qalpyna keltirýge kómektesýge daıyn
ASTANA. KAZINFORM – Reseı Prezıdenti Vladımır Pýtın Qazaqstanǵa amýr jolbarystaryn berý máselesine toqtalyp, sırek kezdesetin janýarlardy saqtaýdaǵy halyqaralyq yntymaqtastyqtyń mańyzyn atap ótti.
Sankt-Peterbýrg halyqaralyq ekonomıkalyq forýmy aıasynda halyqaralyq aqparat agenttikteriniń basshylarymen ótken kezdesýde Qazaqstan Prezıdenti teleradıokesheniniń bas dırektory Raýshan Qajybaeva Reseı Prezıdentiniń Astanaǵa jýyrdaǵy memlekettik sapary kezinde eń kóp talqylanǵan taqyryptardyń biri Qazaqstanǵa berilgen amýr jolbarystary bolǵanyn aıtty.
— Prezıdent Qasym-Jomart Toqaev bul syıdy sapardyń «erekshe belgisi» dep atady. Muny jaı ǵana ekologııalyq joba emes, eki el arasyndaǵy senimniń jarqyn kórinisi deýge bola ma? — dep surady Raýshan Qajybaeva.
Vladımır Pýtın amýr jolbarystaryn berý tabıǵatty qalpyna keltirýge baǵyttalǵan jumys ekenin aıtty.
— Jolbarystarǵa kelsek, bul — tabıǵatty, ekojúıeni, ósimdikter men janýarlar dúnıesin qalpyna keltirýge baǵyttalǵan is. Bul baǵytta bizge de kómek kórsetilip keledi. Máselen, Tájikstan bizge qar barystaryn bergen bolatyn. Sol úshin tájik dostarymyzǵa rızamyz. Biz amýr jolbarystarynyń popýlıatsııasyn saqtap qalý úshin kóp jumys atqardyq. Bul — álemdegi eń iri jolbarystar. Budan úlkeni joq. Bir kezderi Qazaqstanda da osyndaı jolbarystar bolǵan, — dedi Reseı basshysy.
Ol Reseıdiń bul baǵytta Qazaqstanǵa kómektesýge daıyn ekenin jetkizdi.
— Eger qazaqstandyq dostarymyzǵa qandaı da bir kómek kórsete alsaq, ony mindetti túrde jasaımyz. Bul jobanyń nátıjelerin kórdim, áser qaldyrdy. Bizde jolbarystardy qorǵaýǵa arnalǵan arnaıy sammıt te ótken bolatyn. Bul ǵajaıyp janýarlardyń popýlıatsııasyn saqtaý máselesi álemniń kóptegen elin alańdatyp otyr, — dedi Vladımır Pýtın.
Reseı Prezıdenti ekologııa salasyndaǵy yntymaqtastyqtyń ózge de mańyzdy baǵyttaryna toqtaldy.
— Bul baǵyttaǵy yntymaqtastyqtyń mańyzy zor. Áńgime tek janýarlar dúnıesin qorǵaý týraly emes. Bul transshekaralyq ózenderdiń sý resýrstaryn paıdalaný máselesine de qatysty. Bul baǵytta atqarylyp jatqan jumys kóp. Talqylaıtyn másele de az emes. Barlyq jospar júzege asady dep senemin, — dedi ol.
Buǵan deıin Memleket basshysy Qasym-Jomart Toqaev Reseı Prezıdenti Vladımır Pýtınniń memlekettik saparynyń erekshe oqıǵalarynyń biri Qazaqstanǵa tórt amýr jolbarysynyń jetkizilýi bolǵanyn aıtqan edi.
