Pýtın: Reseı Qazaqstan ekonomıkasyndaǵy eń iri ınvestor bolyp qala beredi
ASTANA. KAZINFORM — Reseı Prezıdenti Ombyda Qasym-Jomart Toqaevpen júzdeskenine qýanyshty ekenin jetkizip, Óńiraralyq forým ekijaqty qarym-qatynastyń damýyna eleýli úles qosyp kele jatqanyn atap ótti. Bul týraly Aqorda málim etti.
— Elderimizdiń yntymaqtastyǵy tabysty damyp keledi. Sóz júzinde emes, is júzinde strategııalyq sıpatqa ıe boldy. Ony udaıy ósip kele jatqan taýar aınalymynyń deńgeıinen ańǵarýǵa bolady. Ótken jyly ekijaqty saýda-sattyq shamamen 28 mıllıard dollardy qurady, al bıylǵy bes aıda, bizdiń statıstıkalyq málimetimizge sáıkes, taǵy da 4 paıyzdan asa ósti. Bul qarqyndy dınamıka keleshegimiz jarqyn ekenin kórsetedi. Sonymen qatar oǵan ınvestıtsııa da yqpal etedi. Óıtkeni ınvestıtsııa aldaǵy kúnge jaǵdaı jasap, kórsetkishterdi aıqyndaıdy. Bul rette de aýyz toltyryp aıtarlyq jetistikterimiz az emes. Sebebi Reseı kásiporyndarynyń, reseılik bıznesmenderdiń qatysýymen jalpy ınvestıtsııa kólemi 30 mıllıard dollar bolatyn 70 joba iske asyrylyp jatyr. Reseı — Qazaqstan ekonomıkasynyń eń iri ınvestory. Áriptestigimiz ártúrli baǵytta órbip keledi. Máselen, metallýrgııa ónerkásibi, mashına jasaý, energetıka, farmatsevtıka sekildi basqa da salalar qamtylǵan, — dedi Vladımır Pýtın.
Budan bólek, Reseı Prezıdenti mádenı-gýmanıtarlyq qarym-qatynasty nyǵaıtý máselesine toqtaldy.
— Gýmanıtarlyq baılanystar salasyndaǵy yqpaldastyǵymyz óte mańyzdy. Bul oraıda, álbette, bilim salasy aldyńǵy orynǵa shyǵady. Qazaqstannyń myńdaǵan azamaty reseılik joǵary oqý oryndarynda bilim alyp júr. Ombyda Qazaqstannyń memlekettik ýnıversıtetiniń fılıaly ashylǵanyn atap ótkim keledi. Reseılik stýdentterge 100 memlekettik stıpendııa usynylǵany úshin alǵys aıtamyz. Olar aqysyz negizde bilim alyp jatyr, — dedi Reseı basshysy.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
