Pýtın Poroshenkomen sóılesti
ASTANA. QazAqparat - Normandııada ekinshi maıdannyń ashylǵanyna 70 jyl tolýyna arnalǵan saltanatty rásimge qatysý úshin kelgen Reseı Prezıdenti Vladımır Pýtın Dovılada Petr Poroshenkomen júzdesti.
Germanııanyń kantsleri Angela Merkel qatysqan eki el kóshbasshylarynyń áńgimesi Frantsııa prezıdenti Fransýa Ollandtyń atynan uıymdastyrylǵan resmı tańǵy as aldynda ótti. RIA «Novostı» habarlaǵandaı, Pýtın men Poroshenko birer mınýt qana sóılesti.
Budan buryn Pýtın men Merkel «Normandııa» qonaqúıiniń «Van Dongen» zalynda jabyq esik jaǵdaıynda Ýkraına ahýalyn talqylady. Eki el kóshbasshysy jýrnalısterdiń aldynda qol alysyp, sýretke tústi.
